2022年3月22日
噚日揀咗隻恒指熊(57902)出嚟，喺噚日下半場開市後見到指數喺小時圖上失10小時線(小時圖10線)，再等多5分鐘，入場訊號響起，(57902)可以入場。以下晝1點5分至1點20分，(57902)高低位做過0.073元/0.069元，平均買入價為0.071元。同步亦都set好咗目標價為指數進一步回落至20小時線(小時圖20線)。
其實呢注都等到差唔多瞓著，事關恒指又嚟下半場橫行嘅格局，去到最後一個鐘，當時10小時線約21138點，等到3點35分左右，終於見指數失守10小時線，(57902)總算抵壘。以3點35分ontop加15分鐘作為走貨時間，以(57902)期內高低位做過0.082元/0.074元，平均沽貨價為0.078元，呢一趟平均賺幅只有9.86%，扣埋手續費嘅話，隨時都係樹懶爬格注。
望望月曆，今個星期又開始多返藍籌業績，噚日都出咗隻，就係煤氣(00003)，由細細個開始已經知道煤氣為收息股愛好者嘅其中一隻「飛佛」，但自從派息政策由例牌嘅10送1，到三年前變成20送1，到噚日唔送，期間都相信有唔少收息老散放棄佢，隨時10蚊都企唔穩。
今朝恒指開市升97點，報21319點，開市後指數有一下篤穿咗日線圖條20天線，不過好快又回過落去，怕且都係被騰訊(00700)低開低走所影響，而呢隻企鵝就將會明日公布業績，今朝仲有條新聞話騰訊音樂會來港作第二上市。從前騰訊績前都係部署好倉嘅指定動作，因為佢份業績真係會令人期待又驚喜，但大家都明白一件事唔會永遠都見到高增長，當業績開始稍有退色嘅時侯，大行們總會喺佢份長達幾十頁嘅業績裡頭，搵到一啲「國王的新衣」嘅data出嚟，再出份報告放大、讚美，當有幾間行同時做緊呢樣嘢嘅時侯，誇誇群因而出現，如是者，績前部署定好倉呢個「習俗」就會繼續。
不過，綿羊身上嘅毛總有一日會被人剷走，或者去年內地對互聯網公司嘅監管，只係比多把鉸剪出嚟，騰訊股價由去年2月高位775元，累跌至今年3月(截至今日依家10點9分止)，月內最低見過297元，累跌61.68%。
睇返騰訊日線圖，由上個星期四(3月17日)到依家股價都係未能上破20天線以上位置，雖然下方有10天線支持住，不過：截至依家10點17分止，股價曾經失守10天線。保歷加通道口比之前有所收窄，Slow STC(14,3)兩線於中軸水平始見%K線稍稍穿%D線。
騰訊熊(56769)，收回價405.88元，同現價有逾10%差距，五分鐘圖見股價暫時處於保歷加下降通道運行，雖然揀到有一成打靶距離，但都有約8.57倍槓桿，夠做DT，進取吼股價喺五分鐘圖上，再次上返保歷加通道中軸唔破位時出場；安全嘅一如以往用返Slow STC(14,3)上到超買位先至出場，博做即日Swing Trade。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
