2022年3月15日
美股隔晚都係彈唔起，三大指數先升後回，僅道指靠穩無跌，標指跟納指繼續向下，至於港股就繼續尋底，失守21000跟19600點兩個關鍵底後仍未止跌，今早更失守埋萬九呢一關。恒指低開600點報18931，失萬九關後跌勢持續，半日最多跌934點，創2016年2月12日以來新低。其後，內地公布經濟數據好過預期，加上恒科指一度回升，令港股跌幅收窄至138點，見19392半高位，可惜沽壓未有退減，稍有反彈沽盤又出動，半日最終未能守住19000點收市。中午恒指收報18947，插584點；國指半日跌195點，中午報6359；恒科指已經第N次創成立後新低，今早曾低見3507，半日報3689點，仍要跌逾2%。
恒科指今日咁嘅款，多得摩通踩多腳，指中國互聯網股唔吸引，短期無估值支持，下調該行覆蓋28隻中資互聯網股評級至「中性」或「減持」，唯一只有快手(01024)畀咗個「增持」評級，不過半日一樣跌2%。科技股整體下跌，ATMXJ之中，只有美團(03690)逆市升0.7%，不過唔好話阿Man烏鴉口，家陣呢啲股份，稍為反彈都成為淡友開刀對象，下半場分分鐘倒跌，千祈咪多手博反彈。阿里(09988)半日再跌6.7%，京東(09618)跟騰訊(00700)半日跌逾5%，其他科技股跌多過升，只係跌多與少嘅差別。
其他藍籌股普遍下跌，平保(02318)半日插近一成，係表現最差藍籌股。業績後公布回購嘅友邦(01299)半日跌5.1%，連回購呢個免死金牌都頂唔住。至於早前因為油價強勢嘅石油股，隨住油價近日回落，並創下兩周低位而回吐，相關股份全部被拋售。金礦股亦如是，現貨金價回落至1950美元之下，金礦股及相關ETF捱沽，普遍跌幅超過3%。
港股低處未算低，最慘係咁低都仲未搵到個底，兩個大位21000及19500點相繼失守，可以預示短期內，呢兩個位將由之前支持位變為阻力位，究竟港股個底喺邊，阿Man無水晶球答你唔到，只知道暫時易跌難彈，咁嘅情況都係繼續靠邊站。
麥狄文
(徐狄怡‧證監會持牌人)
