2022年3月10日
市場逐漸消化歐美制裁俄羅斯的消息，即使美國決定停止進口俄羅斯石油，油價都未能繼續攀升，隔晚油價急回，歐美股市趁機反彈。港股噚日下半場已從低位反彈逾600點，今早反彈持續，連跌四日逾1800點後，今早一度再彈逾400點。不過，大市反彈力度始終有限，加上市場對俄烏局勢未敢掉以輕心，避險情緒仍未完全退減，中午升幅無咁一截，恒指21000關得而復失。
恒指高開478點，最多升486點，見21114半日高位，其後升幅大大縮減至只有135點，見20763半日低位，其後回升逾200點收市。恒指中午報20888，升260點；國指升83點，半日報7273；恒科指半日升71點，報4465。半日大市成交額859億元，未算突出，反映投資者仍然審慎。
藍籌股普遍反彈，不過油價急挫，三桶油逆市下跌，中石油(00857)半日跌3.6%，成為表現最差藍籌股。友邦(01299)明日派成績表，半日彈4.3%，可惜未能重上75元，早前嘅支持空間75至78元，又變成短線阻力。ATMXJ表現不一，當中以美團(03690)半日跌0.6%表現最差，雖然其餘四股半日均見上升，但大部份較高位回落唔少，全部半場均開出陰燭。比亞迪(01211)噚日一度跌穿180元後倒升收市，今日反彈之勢延續，目前重上200元大關，能否進一步向上回補下跌裂口，200元企穩與否成關鍵。
油價急挫航空股反彈，國泰(00293)派成績表後，半日再升6%，捱咗咁多年勁蝕嘅原油期貨對沖合約，今次份業績顯示由上季開始有錢賺，更因為咁樣令公司整體業績蝕少咗，雖然油價隔晚急回，但累計升幅驚人，喺俄烏局勢仍緊張下，油價就算呢吓回咗，應該仍然會喺高位徘徊一段時間，睇嚟國泰今年份業績都係靠啲期油對沖合約撐住。至於其他航空股亦反彈，三隻中資航空股，升幅由超過3%至8%不等。
兩會顯示支持新能源國策不變，噚日綠色能源股龍頭龍源電力(00916)已見逆市上升，今日輪到光伏股受捧，整個板塊嘅股份，升幅至少都有2.4%，最勁嘅創維(00751)半日更升一成二。
金價跟油價同喜同悲，油價急挫之際，金價亦跌穿2000美元大關，黃金相關股份及ETF逆市下跌。不過中長線金價喺通脹高企下，仍可以睇好，只要金價守住1950跟1900美元呢兩個位，目前只係急升下調整，強勢未改。
麥狄文
(徐狄怡‧證監會持牌人)
