2022年3月1日
俄烏局勢雖然仍緊張，但雙方開始展開談判，隔晚道指收市跌幅收窄，納指更倒升。港股過去三日再累跌近千點後，今早微微高開後表現反覆，淡靜偏軟，半日成交額不足600億元。恒指高開26點。見22739，一度升104點，見22817點，其後再掉頭回落。內地公布2月製造業PMI好過預期，帶動港股最多升104點，高見22817點，但投資者對俄烏局勢仍有戒心，拖累大市一度倒跌92點，報22620半日低位，其後跌幅收窄，喺22700爭持。半日報22694，跌18點；國指跌不足1點，8000大關失而復得，中午收報8023；恒科指連升兩日，半日報5128，升10點。
藍籌股個別發展，友邦(01299)半日升0.41%，其實呢啲位嘅友邦都諗得過，中線收集，最多就跌穿78元止蝕，都算有數圍。騰訊(00700)跟京東(09618)半日表現好過阿里(09988)跟美團(03690)，唔少缸邊友都等緊阿里會唔會失去紅底股身份，暫時叫做仲頂得住。陳姑娘一句全民檢測可能要停市，嚇到港交所(00388)噚日一度插水4%，今日跌勢未止，半日仲要跌多1.2%。
其實早喺前年全球疫情大爆發之際，紐約、倫敦跟上海，都曾經採取嚴厲封城措施，當時當地嘅股市都無停市，睇怕係早就嚇親嘅缸邊友諗多咗，可能陳姑娘指嘅停市，係停街市或超市啫。而今日亦對相關誤解作澄清，已表明就算全民檢測有考慮要禁足，港股亦唔會暫停交易嘅。講真，港股電子化已超過20年，即使全民禁足，股市亦可如常運作。
信義玻璃(00868)半日升4.8%，主要係去年多賺八成，業績理想帶動；不過，同系信義光能(00968)去年盈利只增8%，中午就跌咗1.8%。
內需食品股表現唔錯，可能同噚日全城瘋搶物資儲糧有關，奇怪係啤酒股普遍造好，青啤(00168)彈高4.5%，潤啤(00291)揚3.1%，百威(01876)升2.1%，唔通留家抗疫禁足，要靠酒精紓緩情緒???其他食品股亦向上，儲糧必備嘅即食麵代表，日清食品(01475)半日升3%，純一(00220)半日升2.2%；至於牛奶呢啲必需品，同樣係儲糧必備，蒙牛(02319)半日升0.6%，創52周高位。
資源股今日回吐，俄烏局勢看似稍為緩和，之前炒起嘅商品價格亦見回吐，今日相關資源股亦隨之回軟，連石油股都唔例外。暫時市況仲係受戰事消息左右，市況尚未轉穩，睇嚟都係唔好手多，股票嘅嘢，寧買貴都莫買錯，建議都係忍忍手，暫時躺平有着數。
麥狄文
(徐狄怡‧證監會持牌人)
