2022年1月5日
美股隔晚個別發展，道指再創新高，但喺債息攀升下，新經濟股捱沽，中概股嘅科技股又插水，納指隔晚跌逾1%。港股主要受重磅科技股拖累，家陣ATMXJ佔恒指比重超過兩成，呢幾隻股唔精神，港股當然無運行。恒指叫做險守二萬三，但恒科指又創成立後新低，盤中更曾跌逾4%。
恒指高開33點，報23323，經已係半日高位，科網股沽壓沉重，港股愈跌愈多，半日最多289點，見23000。幸而舊經濟股，尤其銀行股撐得住，港股跌幅收窄。恒指中午收23092，跌197點；國指則跌107點，報8072；恒科指半日曾低見5350，創成立後新低，半日報收5384，跌197點。半日成交額833億，跌市成交增加，當然唔係一件好事。
藍籌股中以中移動(00941)表現最好，公司回購兼A股首日掛牌，H股半日升5.5%，係最大升幅藍籌股，美中不足係裂口高開但又企唔住個開市價，出咗陰燭圖就無咁靚仔。金融股表現亦唔錯，全靠佢哋撐住恒指，先可以守到二萬三大關，內險同內銀股都見上升，至於本地銀行股，恒生(00011)同中銀香港(02388)圖幾靚仔，不妨望多兩眼。而內銀股方面，阿Man就睇好交行(03328)同招行(03968)，相對國有銀行，阿Man對呢兩間銀行更有好感。
科網股真係無眼睇，騰訊(00700)派送京東(09618)變相減持後，又宣布減持新加坡遊戲及電子商務公司冬海集團Sea Ltd (SE)的股份，市場憂慮騰訊繼續減持手上嘅科網股，美團(03690)成為潛在被沽對象，股價半日近一成，失守二百大關，更成為表現最差藍籌股。奇怪係京東都畀騰訊派咗禮物咁減咗，但股價今日都要插水6.3%，其他科網股閒閒地跌2%以上，總之科網股一如阿Man所講，有排無運行。
至於早兩日炒得好哋哋嘅新能源股，今日亦捱沽，而新能源汽車股亦陪跌，大部份股份跌3%或以上，龍源電力(00916)再跌穿18元水平，睇嚟又係時候搵位撈一撈貨，博個市穩定返，資金又再翻炒新能源股。新能源股唞氣，反而石油就上咗去，布蘭特期油重上80美元大關，石油股逆市向好，三桶油分別升2%至4.5%不等，油服股亦有資金追捧。
麥狄文
(徐狄怡‧證監會持牌人)
