2022年1月3日
美股上周五喺2021年最後一個交易日無乜方向，三大指數偏軟，內地股市就休假至明日先復市，港股今早先高後低，半日倒跌。恒指高開112點，報23510點，重上20日線(約23436)後，最多升207點，見23605點半日高位。其後20日線得而復失，半日倒跌散場，仲要穿埋23300點，盤中曾跌163點，見23234半日低位。恒指中午報收23252，跌144點；國指跌69點，報8166；恒科指跌55點，報5615。半日成交只有411.88億元，北水仲放緊假，市況比較淡靜。
藍籌股表現好壞參半，友邦(01299)升不足1%；大笨象(00005)就跌0.3%；中生製藥(01177)半日升2.6%，藍籌股中表現最好。公用股今日有資金追捧，煤氣(00003)、中電(00002)及電能(00006)全部升逾1%。AMTXJ則下跌，表現麻麻，其他科網股亦無厘神氣。申洲(02313)寧波北侖區出現新冠肺炎疫情，部分生產基地停產，半日急跌7.9%，為表現最差藍籌。
有消息指恒大(03333)於海花島39幢樓宇違規須強拆，股份今早停牌，拖累內房股及物管股全線下跌。融創服務(01516)跌12.7%，世茂集團(00813)及融創中國(01918)跌逾一成，係表現最差嘅國指成份股。其他內房跟物管股閒閒地跌半成或以上。話咗呢個板塊有排無運行，三日唔埋兩日就爆啲利淡消息，買咗貨真係有得震，冇得瞓。
醫藥股走勢迴異，生物科技股表現疲弱，香港上市生物科技指數半日插3.1%，龍頭藥明生物(02269)半日跌6.2%，信達(01801)亦跌8.2%，其他生科股跌幅由8%至15%不等。但中藥股表現強勁，內地合規中醫藥納入醫保，帶挈中藥股再受追捧。龍頭中國中藥(00570)升咗幾日，半日再升13.2%，創52周新高。華潤醫藥(03320)半日更急升兩成，其他醫藥股閒閒地升一成。
新能源股今日亦做好，風電股有龍源電力(00916)跟金風科技(02208)做代表，半日分別升逾5%及4.5%。儲氫概念嘅中集安瑞科(03899)創52周新高，半日升近一成。其他半新能源股如華潤電力(00836)，半日亦升3.6%。睇嚟呢個板塊今年上半年都會係焦點，值得逢回吐吸納。
麥狄文
(徐狄怡‧證監會持牌人)
