2022年1月3日
喺2021年最後一個交易日，恒指雖然高開低走，但喺一眾科網股帶領下，半日升285點收市；而去年年初第一個交易日升241點，2022年第一個交易日，似乎都想有個好開始，皆因完U盤之後見指數升112點，報23510點開市，呢口價已經係踩咗入熊證第一層街貨23500至23599點，只係呢一層得2張期指街貨咁大把。
喺聊天室上計劃好開市出動小注好倉追恒指五分鐘圖Slow STC(14,3)上到超買，或者以保歷加通道頂線作為目標，但一開市之後，指數好快咁將升幅擴大至上破23600點，將第一層熊證全數殺死，同時亦上抵到保歷加通道頂線，所以第一注嘅小注出好倉出唔到，不過嚟到9點38分，指數已經見升幅收窄，一幅高開低走嘅樣出晒嚟。
再去到9點49分，恒指已經見升轉跌，喺小時圖上完美見到150小時線(小時圖150線)出現阻力，Slow STC(14,3)兩線向下，一幅高開後遇阻見低走嘅樣，見指數高開低走姿態愈嚟愈明顯，聊天室都換上懶人方法：用小時圖出淡倉以10小時線(小時圖10線)為目標，事關喺小時圖上見Slow STC(14,3)喺開市時都仲有70幾呢個位向下回落，以天線向下逐層逐層殺的話，最近嘅就係10小時線，that’s why用住呢條線睇住就係咁解。
依家10點28分，指數喺五分鐘圖上的確有見再向下落嘅走勢，而小時圖同10小時線都仲有啲距離，如以懶人方法，用小時圖開淡倉的話，恒指熊(60019)，收回價23700點，同現價有近370點差距，咁近就係貪佢有約47.61倍槓桿可以做到Day Trade，穿10小時線當然繼續，見支持嘅咪走囉。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
