2021年11月12日
市場正消化強勁通脹數據或令美國聯儲局提早加息，美股隔晚個別發展，道指繼續腳軟，標指跟納指則叫做企穩咗腳。港股今早威過一陣，可惜A股偏軟，半日先高後回。恒指高開274點，一度重上20天線(25436)，最多升279點，見25527點，創11月2日以嚟高位，其後升勢回順，升幅一度收窄至僅剩19點，見25267點半日低，20日線得而復失。恒指中午收報25302點，升54點；國企指數升29點，報9078點；恒科指半日升58點，報收6523點。
藍籌股個別發展，友邦(01299)公布第三季業績，新業務價值按年升2%，喺疫情影響下表現都算係咁，股價半日升0.8%。申洲(02313)半日升3.1%，碧服(06098)隨其他內房跟物管股反彈，半日升2.3%。海底撈(06862)以接近下限定價配股，半日股價跌7.4%，又去返接近今年低位，走勢持續疲弱，成為今日表現最差藍等股。
騰訊(00700)公布完業績，雖然季績表現一般，而元宇宙發展亦不過係講多過做嘅階段，但投資評級未有被大行調低評級，目標價雖有微跌，但亦未有被狠劈，股價半日彈1.6%，股價半日最高見491.4元，500元阻力唔易過，有貨喺手博短炒，阻力之前要識食糊將錢袋。雙十一購物節兩大電商下單金額高下立見；京東(09618)「雙11」下單金額達3491億元人民幣，按年升28.6%，股價升4.9%；相反阿里(09988) 雙11成交僅升8.5%，增速放緩，兩者高下立見，股價表現亦有異，阿里半日逆市跌1.4%。而今日有部份資金冷敲三四線科技股，靜咗好耐嘅比亞迪電子(00285)半日升4.9%；冷門嘅雷蛇(01337)跟科通芯城(00400)半日升逾一成。
差不多又到恒指成份股季檢，農夫山泉(09633)成為呢一輪染藍嘅大熱門，裂口高開半日升5.9%。其他食品股跟飲料股亦見資金追捧，啤酒股飲得杯落，百威亞太(01876)升3.2%；華潤啤酒(00291)升2.4%。其他食品股半日升幅由不足1%至7%不等。
早兩日有資金流入半導體股，熱炒嘅中芯(00981)今日一盤冷水照頭淋，公司高層大地震，就算集團公布第三季股東應佔溢利為3.21億美元，按年升25.34%，表現唔錯，股價近半日跌近半成。講到半導體股，阿Man心水係表現較為落後嘅ASM太平洋(00522)，股價喺80元水平有頗強支持，呢啲位上車有得博，股價企返上85樓上，就有條件重返88至90元水平。
麥狄文
(徐狄怡‧證監會持牌人)
