2021年11月10日
美股近日屢創新高，不過俗稱「恐慌指數」嘅芝加哥期權波動率指數(VIX)，靜雞雞上咗17.32點的兩周高位，VIX有異動，美股又點會唔調整，隔晚美股三大指數回吐，道指跌112點，標指跟納指分別跌16點及95點。嚟緊美股會唔會作更大幅度調整，大家要留意住個VIX點行點走。至於港股呢，已經一段時間唔跟美股升，但就識跟美股跌喎，今日港股跌到超過一個月低位。
恒指低開25點，早段曾到升21點，見24834點半日高，之後沽壓漸重，盤中一度跌331點，見24481點，創10月7日以嚟新低。恒指中午收報24520點，跌292點；國企指數報8709點，跌96點；恒科指半日跌33點，報6188點。半日大市成交額652.06億元，又唔可以話多，但多過噚日唔跌嗰陣囉…..
藍籌股無乜好講，金融股續跌，友邦(01299)跌3.3%，滙控(00005)跌1.7%，平保(02318)跌2.3%，內銀股平均都要跌1%以上。至於剛公布喺袋鼠國掃咗個文物級數建築商場項目嘅領展(00823)，今日公布季績，股價半日跌0.7%。至於舜宇(02382)，10月車載鏡頭出貨按月錄增長，半日升1.5%；舜宇早段插水後反彈企返200元，但上面畀啲平均線頂死晒，短期唔會有驚喜。
Elon Musk無啦啦話要沽緊啲Tesla股票嚟交稅，嚇到Tesla股價隔晚急挫一成，拖累港股呢邊嘅汽車股都插水，三架較受市場歡迎嘅呠呠車，比亞迪(01211)跌5.1%，吉利(00175)跌4%，長汽(02333)跌3.2%。而Tesla概念股同樣要跌，億和控股(00838)跌7.5%，力勁科技(00558)挫4.2%，贛鋒鋰業(01772)跌6.8%，福耀玻璃(03606)跌2.3%，敏實(00425)跌2.2%，無一倖免。不過唔跌又邊有得趁低吸納，相信減碳排繼續利好電動車股，阿Man認為300樓下嘅比亞迪，同140邊嘅贛鋒鋰業有得博，前者用返上次公布批股後低位282止蝕，後者則用上月中低位128嚟做止蝕參考。只要Tesla雨過天青有得彈，龍頭股彈力亦會堅挺啲。
以為內需股合符阿爺嘅內循環政策，應該算係政策風險有限股份，點知阿爺又透過官媒發炮，指乳業唔應該追求高端化，一眾乳業股又畀阿爺玩死，龍頭蒙牛(02319)半日更跌逾7%，似乎跌過龍。蒙牛就表示企業既要滿足消費升級需求，又要滿足最基礎消費需求，對於蒙牛嘅供應鏈體系係一個大挑戰。呢個消息出嚟，蒙牛今日股價一嘢下試條保力加通道底部45元，企得穩呢個價，其實有得彈，46樓下上車，博過度高端化呢個消息over react，反彈去返48。
麥狄文
(徐狄怡‧證監會持牌人)
