2021年11月9日
隔晚美股三大指數續創新高，主要係美國通過咗基建方案，令美股保持樂觀氣氛。港股繼續無厘神氣，今早高開低走。恒指高開189點，最多升192點，見24956點半日高位，後勁不繼，一度倒跌85點，見24678點半日低位。恒指中午報24745點，跌17點；國指則跌5點，報8788點；恒科指跌19點，報收6174點。半日成交額縮水至不足600億元，資金似乎對港股興趣有限，缸邊友反而集中炒美股。
重磅股個別發展，明日派季度成績表嘅騰訊(00700)半日跌0.4%，美團(03690)、阿里(09988)跟小米(01810)都係死死下，無乜起色。其他金融股今日亦乏善可陳，大笨象(00005)、友邦(01299)跟內銀股均見下跌，不過跌幅均限於1%之內。半日表現最差嘅藍籌股為舜宇(02382)，噚日急跌後今日仲未識彈，半日再趺3.4%。相反噚日跌穿紅底嘅藥明生物(02269)今日反彈逾8%，始終噚日有啲跌過龍，今日開市上返95元企穩，紅底股身份失而復得。要講呢幾月最弱嘅藍籌股，一定係海底撈(06862)，有大行將其目標價劈至17元，噚日彈完今日無以為繼，半日跌返些少，家陣睇下條10日線頂唔頂得住。海底撈愈撈愈底，口痕友話炒男團偶像Anson Lo，都好過炒海底撈。
出行及旅遊股噚日落鑊，但中港兩地通關仍未落實時間表，加上內地嚴格防控，講明只要香港出現一單本地個案即落閘，又要暫停通關，嚴苛條件下，所謂通關受惠行業未必好受惠，相關股份今日亦見回吐，阿Man都叫咗咪高追呢類股份，否則又要再坐一會。
反而阿Man睇好新高可期嘅比亞迪(01211)，「漢」系列車款10月銷量再度破萬輛，並連續七個月錄正增長，中午升1.9%；其他汽車股表現亦唔錯，錄得1至超過2%升幅，吉利(00175)跟長汽(02333)上月銷量均見增長。除咗汽車股，阿Man有留意4S車股永達汽車(03669)，股價暫未能收復100天線，但走勢見改善，若能企穩250天線12.66，有望重返13至14元水平。
麥狄文
(徐狄怡‧證監會持牌人)
