2021年11月1日

【輪證贏家】恒指日線失守五條主要平均線

10月整個月的交易的確做得不好(詳見Patreon上最新的【月度報告】)，而上周五(10月29日)出的恒指熊(64977)，於下半場時間見指數於十分鐘圖上一度高於保歷加通道中軸，唯留意到整條保歷加通道都向下，貪心鬼見到呢個情況於是再捱多一陣，大約去到1點55分，指數於十分鐘圖上見再次回落返去保歷加通道中軸以下，不過於五分鐘圖更快一步已經到達保歷加通道底線，Slow STC(14,3)兩線都向超賣水平出發，望望隻(64977)證價上返去0.091元水平，但過多一陣，指數似乎已經喺五分鐘圖有跌定嘅情況，唯有走人，以1點55分至2點呢段時間(64977)高低位做過0.093元/0.088元計，平均沽貨價為0.0905元，對比平均買入價0.083元，呢趟平均賺幅為9.04%，為整個10月的交易劃上句號，算是打個和，但當中未計所有交易嘅手續費。

反而膽粗粗喺10月22日嘅《【每日一股】車股要回落了嗎？》裡面提到比亞迪(01211)，嗰日出淡倉的確要捱過比亞迪股價上300元樓上，捱過之後上個星期四(28日)同五都見股價高位回落。今日再受配股消息影響，日線圖見比亞迪連10天線都確認失守，個別聊天室戰友有陪我發顛，一早出比亞迪淡倉，今日終於都守得雲開。

睇返今日恒指，11月第一個交易日就見指數跌逾200點開市，依10點5分，恒指最多跌逾300點，最低暫見25024點，換言之，首三層牛證街貨，即由25300至25399點，至到25100至25199點全數被收回，呢三層夾埋有相當於1521張期指，依家最貼價層25000至25099點，以暫時最低25024點計，即再拆細的話25050至25099點嘅牛證其實都已經死晒，呢度有相當於123張期指，再加埋上去即係有1644張期指已經死亡。

聊天室有新戰友加入，講解得嚟原來指數連25000點都穿埋，早知係咁就唔駛搵個50點為一嘅街貨分布圖出嚟計餐懵啦，依家最貼價牛證為24900至24999點，其實呢層都仲有300幾張期指，不過可能恒指呢個時侯會想儲返多少少牛證貼價貨，先至再向下殺。

換個日線圖睇恒指，其實今朝一低開之後指數已經度於20天線同50天線以下範圍，換言之指數已經處於保歷加下降通道，Slow STC(14,3)兩線仍然向超賣水平方向出發，就算整條保歷加通道仍然呈上，但指數都處於五條平均以下，重點係指數目前仍然近牛證街貨，那怕今日有更多更新更貼價嘅熊證上市，但指數再向下走多300點，貼熊都會變遠熊。

恒指Put(29171)，行使價24900點，低引伸、高槓桿，成朝都未見指數喺五分鐘圖上到50分鐘線(五分鐘圖10線)，Slow STC(14,3)連中軸都未去到，唯有等下下半場會唔會有位入啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

即市聊天室/Patreon：https://www.patreon.com/cbbcwar

FB：https://www.facebook.com/cbbcwar