2021年10月21日
如常起身開電視睇新聞，的確係習慣咗睇三色台個新聞台嘅，噚日睇嘅時侯，好似少咁樣咁，今日終於都留意到，就係右下角會loop住啲外匯報價，同埋澳洲、日經兩條指數，噚日唔見咗條日經，心諗無理由日本放假架，唔通佢哋出少咗？今日特登再留意嘅時候，又真係無喎，Check過日本都無休市，唔通三色台將要比錢嘅real time嘅日經data變成唔駛錢嘅end of date？
少咁條日經睇又無乜所謂嘅，反正都係參考下，更重要嘅係唔係得三色台有嘛。去到9點21分，恒指正式完U盤，以升5點嚟開市，都係嘅，呢兩日恒指都硬上爆幾百點向上殺熊，推到日線Slow STC(14,3)上到嚴重超買位，再硬推上去有咩股份可以接力？
依家10點正，喺聊天室同戰友一齊睇住恒指，真係Chok到頭都暈，由今朝早恒指升5點開市後，至依家半個鐘頭之內都不知轉咗幾多次燈，五分鐘圖保歷加通道又仲未見明顯拓闊，就算出Swing Trade，呢頭落完嗰頭變樣，手都真係唔夠快，唯有睇定啲先再算。
就望下恒指牛熊證街貨圖先，今日見兩邊都無新增街貨層，熊證嗰邊當然儲住唔少街貨啦，本以為要上到26500至26599點先見重貨，咁佢都重嘅，但最重嘅係26400至26499點，呢兩層都有逾800張期指街貨。至於最貼價牛證仍然係25300至25399點，呢度雖然得600幾張期指街貨，但都已經係重貨區嚟架啦。以恒指現價(@10點6分報26135點)計，指數當然仍然近熊證街貨層啦。
嚟到10點19分，指數仍然未見有明確方向出咗嚟，唯有向個股出發。以日線圖計其實都有唔少個股Slow STC(14,3)上到超買至嚴重超買水平，不過，當中比較有開始高位回落嘅走勢，就係堆汽車股，尤其是隻比亞迪(01211)。
不過，依家10點28分，指數喺五分鐘圖上係咁行「三角形」出嚟，都幾反映大市喺26000點樓上呢個位出好淡爭持力度好強。始終指數近熊證係不爭事實，但萬一指數要再上的話，就要繼續搵股仔嚟推高，有咩仲係可以追落後？可能係內銀掛，亦都有可能再硬推重磅股或者超買股再去，容易吸錢嘛。
當未有方向或者摸唔清個市嘅時候，最好嘅方法就係paper trade，到摸返清個市場之後先至再出手；冷靜已經贏咗三分一架啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
