2021年8月9日

【輪證贏家】比亞迪小時圖STC超賣等轉勢

一連兩個星期嘅奧運終於都完滿結束，港隊以一金兩銀三銅總共六個獎牌嘅成績完成今屆奧 運，係歷年來成績最好，反映咗後生一代為香港運動界所付出嘅真係好多，我相信今屆奧運亦係香港人睇得最興奮、嘩得最多嘅一屆，感謝香港運動員嘅努力，繼續加油前行！

依家9點41分，我家肥貓就開始瞓覺就即係代表恒指開咗市，今朝開市跌210點，低於26000點以下水平，但好快指數跌幅已見有所收窄，去到依家已經見指數倒升4點；再比多五分鐘，恒指升幅又再擴大，但係喺五分鐘圖上見到指數上破完100分鐘線(五分鐘圖20線)、250分鐘線(五分鐘圖50線)同500分鐘線(五分鐘圖100線)之後，作勢行出疑似「射擊之星」嘅物體出嚟，隨後都見Slow STC(14,3)由今朝早嘅超賣水平彈返上去超買位，依家再見回落，成件事歷時大約半個鐘，希望聊天室戰友們今朝早有一齊先偷住好倉爬格仔先啦。

嚟至10點5分，喺恒指五分鐘見指數再次向上爆上，今次連五分鐘圖上嘅保歷加通道口都拓闊埋，聊天室揸住好倉嘅戰友又可以腦輕鬆一陣，但都要間中留意住啲天線會唔會追得返上去指數附近做佢支持。

又再嘗試喺個股搵食，最終搵到去比亞迪(01211)，事關喺五分鐘圖見到比迪今朝大裂口低開之後股價一直向下走，至發現佢嘅時侯大約喺10點8分左右，Slow STC(14,3)兩線已經落到個位數嘅嚴重超賣平；再去小時圖見到Slow STC(14,3)都有同樣嘅情況，難得五分鐘圖同小時圖都咁鬼相同走勢，就留意下佢啦。

依家10點18分，恒指升幅進一步擴大至升逾200點，拗腰彈上26400點以上，喺牛熊證街貨圖上見到指數今日向街貨出左一巴右一巴，牛熊兩邊最貼價層都被佢殺，依家恒指五分鐘圖條sstc(14,3)又上返去嚴重超買水平，Swing Trade出反手又喺時侯。

再望下隻比迪，五分鐘圖終於都見到比迪股價上行兼Slow STC(14,3)數值確認低位回升，不過依家就挑戰緊條50分鐘線(五分鐘圖10線)。比迪牛(55461)，收回價250元，同現價有逾4%差距，高槓桿適合DT用，破得到50分鐘線先出手，破唔到你就早抖，我繼續喺恒指度玩返Swing Trade，反正頭先喺恒指五分鐘圖上見Slow STC(14,3)兩線上到90以上嚴重超買水平時，陰陽燭圖咁啱遇上「倒T星」，恒指熊(51189)，收回價 26800點，同現價有逾480點差距，槓桿有成42倍。都適合DT用。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN