2021年7月6日
隔晚美股假期，不過港股就持續下跌，主要係滴滴出行個叫車app，被阿爺勒令下架，由於內地對科網企業監管升級，令港股相關科網股被北水掟貨，拖累港股噚日一度跌267點，最終恒指收市跌166點，報收28143點，連跌5個交易日。今日相關股份跌勢未止，科網股冚包散，又到生化藥股出事，原來國家藥品監督管理局藥品審評中心(CDE)上周五發布新通知，發布徵求《以臨床價值為導向的抗腫瘤藥物臨床研發指導原則》意見通知。喺新指引下，市場憂慮日後獲批上市嘅新藥數量大減，影響未來醫藥外包公司嘅盈利能力。
呢個消息衝擊下，相關生化藥股全線仆值，最慘係連海吉亞醫療(06078)、微創醫療(00853)呢一類非生化藥股亦受拖累，閒閒地跌三五個巴位不等。藥明生物(02269)半日跌12.6%，成為表現最差藍籌，藥明生物之所以咁大沽壓，係因為此股已經批過N次，雖然每次批股後都繼續創新高，但正因為貨源唔集中，喺好多唔同基金手上，如今新政策出台，持貨者見手上仲有盈利，都選擇先沽貨鎖定利潤，今日一有利淡消息，自然放量下跌。CDE新指引令生物科技股反艇，除咗藥明生物之外，其他生物科技股閒閒哋跌5%以上，跌近一成股份比比皆是。反而信達生物(01801)阿Man認為80元邊有得博，因為貨源相對歸邊，要反彈嘅話應該快過藥明生物。
恒指今早低開6點後，迅速失守二萬八大關，最多跌238點，見27904點，再創5月14日後低位，其後倒升7點，見28151點半日高位。可惜係生化藥股拖累整體氣氛下，大市又復跌，中午恒指報收27980點，跌163點；國指創八個月低位，見10188點，半日報收10232點，跌41點，恒科指繼續跑輸，跌104點，報收7607點。
藍籌大致受壓，比亞迪(01211)新能源車6月銷量飆兩倍，但比亞迪倒跌2.8%；吉利(00175)挫2%；本來汽車股算係近日安全啲嘅板塊，但亦難敵整體氣氛轉差。舜宇(02382)跟瑞聲(02018)齊齊跌逾3%；阿里巴巴(09988)下滑0.2%；旗下阿里健康(00241)插5.9%；美團(03690)微跌0.4%；但騰訊(00700)反彈0.5%；小米(01810)升0.2%；海底撈(06862)反而逆市升4.5%，為表現最佳藍籌，口痕友話之前跌定先，家陣其他仆直時佢有得彈。
麥狄文
(徐狄怡‧證監會持牌人)
