2021年4月23日
有消息指拜登有意向高收入人士加稅，嚇到美股隔晚三大指數齊齊跌近1%，不過中港兩地股市又唔多跟美股走，港股反而重上二萬九大關。恒指高開43點，開市一度倒跌6點，見28748點半日低位，其後扭轉跌勢，坐穩10線(約28822點)並返兩萬九平，曾飆升315點，見29071點半日高位，受制50日線(29171點)回落。恒指中午收報29014點，升258點；國指則升108點，報收11047點；恒科指升197點，報收8477點。半日大市成交額790.58億元，成交唔算特別暢旺。
藍籌股中創科(00669)半日升2.6%創上市新高，藥明生物(02269)半日升4.2%，唔覺唔覺由推介時約90元水平，已升咗超過一成。中石化(00386)半日跌2%，話咗三桶油難炒，捨難取易，阿Man 從來都係睇呢三桶油唔到，上上落落都唔關自己事。科技股今日終於有返啲起色，JATMX全部向上，美團(03690)升6.6%，係表現最好藍籌及科指成份股，緊隨其後為阿里健康(00241)，半日升5.5%，騰訊(00700)、阿里(09988)、小米(01810)；京東(09618)全部有進帳。其他科技股快手(01024)跟網易(09999)等全部升逾2%。
多國領袖舉行氣候峰會，會上宣布減排，新能源概念股又再受追捧，當中以信義光能(00968)升8.2%表現最強勁，其他新能源股閒閒地亦升逾2%。不過呢批股份喺2月時炒到過咗籠，現價跌較高位回落唔少，估值亦唔算高，但上面蟹貨多不勝數，要回復之前強勢難度較高，睇款都係維持區間上落格局。
醫藥股愈升愈有，連重磅級嘅藥明生物都升逾4%，其他較輕磅嘅生物科技股半日升幅更厲害，個別股份半日急升逾一成。今日唔少高增長股都見資金流入，但基於市況仍然反覆，又係星期五周末前夕，醒目嘅唔追貨，仲要搵搵手頭上有冇貨急升可以食一食糊，反正港股仍然係上落市，沽咗嘅貨唔憂買唔返。
麥狄文
(徐狄怡‧證監會持牌人)
