2021年2月9日
美股喺一遍「股災將至」呼聲中再創新高，三大指數以全日高位收市並齊創新高，主要係市場憧憬拜登政府好快會執行19000億美元紓困方案，加上散戶惡鬥大鱷事件暫告一段落，亦未有引發任何系統性風險，美股又生猛返晒。港股雖然今日開始短暫無咗北水助力，但半日向好，預咗呢兩個表現較為牛皮。
恒指高開123點報29442，開市早段表現反覆，一度倒跌55點，低見29263，不過未落到20日線(29171)已見支持，大市止跌回升，曾升170點，見29490半日高位。中午恒指半日收報29432，升113點；國企指數升33點，報11593；恒科指中午收9908，升151點，北水放春節假無入場，半日成交縮水至803.3億元。
重磅藍籌股普遍做好，友邦(01299)半日升1.2%，呢隻係阿Man少數睇好嘅傳統金融股，美中不足係股價沿途上嚟，經常開枝陰燭，令人坐貨唔夠安心。相反平保(02318)半日跌0.2%，表現麻麻。其他藍籌股一向靠北水捧場嘅小米(01810)連跌五日後，今日反而無咗北水有得彈；騰訊(00700)跟美團(03690)繼續升，後者暫時已企穩400元之上。阿里巴巴(09988)半日跌近1%，表現令捧場客失望，不過阿Man堅持阿里呢啲水平係抵買，相對騰訊跟美團呢啲科網巨頭，阿里巴巴相當落後，但價值只會遲到，從不會缺席，肯長線投資坐住巴巴，牛年應該有理想回報。
軟件股今日喺科技股中彈出，尤其次一線嘅Saas及軟件股全部有資金捧場，阿Man上星期喺聊天室向會員推介嘅微盟(02013)半日升近一成，守得住23元話咗有運行，半日升穿26元水平，有望突破前高位。另一阿Man愛股金山軟件(03888)，由舊年推介到今年，每次都唔會令人失望，半日升逾半成，再創新高。另一市場焦點科技股，係新丁快手(01024)，尋日阿Man講過280元附近搵位上車，結果盤中低見283元後，重上300水平收市，恒指服務公司將其納入旗下多個指數，半日股價急升逾一成，升破首日高位。
吉利(00175)上月銷量大增四成，股價半日升逾4%，抖咗咁耐，係時候郁一郁。汽車板塊見資金追捧，另一北水配置重點股份長汽(02333)半日升逾2%，見到瑞信有報告唱好，目標價跟中金報告約而同睇40元，較現價仲有大把水位，即使打個八折，目標價都見32元，較現價仍有超過兩成升幅。比亞迪(01211)喺250元整固完，今日又回升，呢三隻汽車股都係北水愛股，輪估值比亞迪係有啲高，要揀嘅話阿Man現水平會揀吉利跟長汽，比亞迪舊年贏咗足足一倍有多，既然都分咗手就唔回頭，不如另結新歡，今年睇好吉利跟長汽追落後。
麥狄文
(徐狄怡‧證監會持牌人)
