2020年12月11日
美股隔晚個別發展，疫苗消息已消化得七七八八，暫時美股無乜方向，不過港股噚日跌92點後，今早曾發力重上平均線匯聚區，不過日A股高開低走，加上美國啟動取消中國電信(00728)喺當地營運許可程序，市場憂慮中美關係惡化，令港股早段反彈近300點後升幅縮水，限制港股升幅。
恒指高開223點，重上10日線(約26527)及20日線(約26544)滙聚區，開市後最多升293點，見26704點半日高位，其後升勢回順，升幅僅餘34點，報26444點半日低位，恒指半日報收26485點，升74點；國指半日升6點，報10421點；恒科指半日升25點，報收8051點。
藍籌股表現最好係三桶油，隔晚油價做好，布油價上破50美元，三桶油分別升2.6%至6.9%，中海油(00883)尋日見過低位後，今日卒之見反彈，成為表現最佳藍籌股。吉利(00175)半日升4.2%，阿Man認為之前比亞迪(01211)炒到甩轆，今年累計升幅升咗幾倍，吉利(00175)自宣布與戴姆勤合作拓展電動車引擎後，股價突破向上，曾升至24元水平後回落整固，只要股價企穩22元，吉利有條件再挑戰高位。至於其他藍籌股，平保(02318)跟中生製藥(01177)半日跌逾2%。
科技股表現唔錯，龍頭股普遍向上，JATMX全部上升，反而係一直最強嘅小米(01810)今日創新高後回軟，半日倒跌04%，其實小米短線目標28元已達，上星期趁配股震盪撈咗平貨，短短一星期贏足兩成，今日又到星期五周末前夕，食糊套現去買份聖誕禮物好正常。至於受關鍵零部件缺貨消息所累嘅舜宇(02382)及丘鈦(01478)繼續受壓，半日分別跌2.2%及3%。不過獲立景創新入主嘅高偉電子(01415)則避過一跌，半日升2.5%。
物管股唔死都得返半條命，以為碧桂園服務(06098)呢期跑贏板塊其他股份，龍頭股有轉好跡象，呢個板塊有機會走出谷底，但原來股價頂得咁行，係為咗配股抽水，配股價較噚日收市價折讓約9.46%，股價半日跌4.3%。整個板塊畀碧桂園拖一拖又瓜晒，中海物業(02669)創逾一年低，半日跌5.9%；剛上市嘅華潤萬象(01209)強唔得一陣，半日跌2.7%；其他物管股普遍跌2%或以上。
其他股份乏善可陳，反正今日係星期五，周末前夕，不如自己提早收市，就算今晚無得出街食飯，咪早少少去街市買餸，煮番餐好慰勞吓自己。
麥狄文
(徐狄怡‧證監會持牌人)
