2020年8月24日
美股上周五做好，納指跟標普盤中再創新高，道指收市升190點，今日期貨時段繼續做好，帶動港股高開。美滙指數持續走弱，有利股市發展，尤其新興市場。而上周有關美國基金資金流向資料顯示，截至上周三計一個星期時間，美國股票基金錄得資金淨流出近68億美元(約530.4億港元)，反而中國股票互惠基金及ETF(交易所買賣基金)卻淨吸資約11億美元，連帶新興市場股票基金亦淨吸資近15億美元，雙雙扭轉連續4周走資嘅頹勢。
港股上周五升逾300點後，今早再高開高走，講咗N咁多次，淡友咪見跌一千幾百點以為得米，轉個頭又被挾到叫救命。恒指高開238點，升幅一度收窄至211點，見25325點半日低位。不過低位又見買盤湧現，恒指升幅再度擴大，一度升431點，見25545點半日高位，創8月17日後最高。不過25500係一個短期阻力，唔係話企就企。最終恒指中午收報25483點，升369點；國企指數報10312點，升100點；恒生科技指數半日收報7242點，升73點。半日成交金額739億元又唔算多，唔講得上配合升勢。
騰訊(00700)派出一份靚仔業績後，股價卻未能更上一層樓，主要係市場擔心美國有意制裁旗下微信海外版WeChat。不過有消息指美國政府私下向包括美國蘋果公司在內嘅企業保證，可繼續透過騰訊旗下微信(WeChat)軟件，喺中國從事業務活動。呢個消息傳出後，騰訊今日即生猛番晒，半日升3.8%，不過股價要盡快重上550元再破新高先有睇頭，564元之前已三個頂，今次再唔上破，都有啲濕滯。
騰訊呢隻龍頭翻生，其他科技股普遍做好，美團(03690)上周五收市後派成績表，竟能成功扭虧為盈，市場又一地眼鏡碎。美團早段再創上市新高249.2元，但半日一度倒跌，中午升幅收窄至0.8%。至於阿里(09988)跟小米(01810)則分別升3.6%及1%，下月染藍前股價應易升難跌。京東(09618)繼續其尋頂之旅，有貨未見轉燈唔使急住走。靜咗一輪嘅小騰訊微盟集團(02013)半日升逾8%，股價直逼12元水平，微盟要企穩12元方能確認轉勢，否則又繼續上落區間移動。
今日又到水泥股落鑊，不過阿Man最怕高追舊經濟股，科技股追入都有啲把握，傳統股一高追，十追九伏。唔信望一望上周五阿Man叫唔好高追嘅濠賭股，今日全線逆市下跌，話咗高追好易中伏，千祈咪唔信邪。
麥狄文
(徐狄怡‧證監會持牌人)
