2018年3月1日
噚日掛住打完隻稿就搞《財政預算案》，結果就甩轆，交稿時連條題都唔記得改，好彩杜比提返我，證明我個人一有嘢要趕嘅時候就真係會有甩漏。唔該杜比。
話就話要做《財政預算案》啫，但其實噚日都有唔少大嘢出業績，港交所(00388)夠大啦掛，仲有信和置業(00083)同希慎興業(00014)，當然唔少得嘅就係早兩日喺《冷吼銀娛Call博靚績》睇中嘅銀河娛樂(00027)啦，仲揀定咗銀河牛(57025)添。不過噚日見住財爺陳茂波一路宣讀佢份《財政預算案》，個市就一路係咁跌，跌足一個朝早，銀娛又點會幸免呀，真係求命，嗰剎那幾想財爺快啲讀完，一來佢讀完就等於可以放飯，二來個市可能會停止再跌呢。又真係喎，呢個世界有時邪到你唔信，再加埋銀娛本身份業績優於預期，下半場一開市銀娛逆市做好仲倒升，(57025)簡直執身彩，去到下晝1點25分，雖然唔係銀娛Day High位，但見到5分鐘圖SlowSTC(14,3)由超賣上返去超買就知要收手啦，(57025)當時做緊0.057元附近；若然閣下真係咁準等銀娛上到Day High先嚟走嘅話，(57025)都係做到0.063至0.065元呢啲位，同買入個位打成平手，但都叫做輸手續費，算！「山大斬埋有柴」咪得囉！
睇返恒指今日走勢，都係喺早兩日嗰條《冷吼銀娛Call博靚績》稿度寫咗恒指10、20天50天線(31055點、31055點同31064點)有機會出現「三線滙聚」，如是者呢個匯聚點「應該會被視為頗有力度嘅支持」；但見今日恒指低開300幾點之後，依家9點59分，恒指跌幅雖然有所收窄，但好不幸地今日粒燭完完全全處於呢個匯聚點(就當住係31055點先啦)之下，原先嘅頗有力度嘅支持，都恐怕會變成頗有力度嘅阻力。
依家10點18分，恒指報30651點，暫時最低做過30453點。開恒指牛熊證街貨圖，恒指今日個低位已經殺到入30400至30499點呢個位，呢度亦即係牛證嘅重貨區，有相當於1573張期指；而30700至30799點，落至30500至30599點呢三個100點範圍就當然渣都無得剩啦，夾埋有945張期指。
30400至30499點呢個重貨兼最貼價嘅牛證區就未死得晒嘅，而第二貼價30300至30399點，呢度都有成1140張期指。對比起樓上最貼價熊證係31000至31099點嚟講，30300至30399點嘅熊仔都係凶多吉少，恒指熊(57238)，收回價31338點，同現價有逾600點距離，例牌吼恒指5分鐘圖見超賣先好落場。
至於噚日都有提過嘅滙豐控股(00005)，今日就當然隨市下跌啦，日線圖上嘅SlowSTC(14,3)%K線(4.817)同%D線(11.93)都跌到接近跌無可跌嘅地步，不過14RSI仲見33.9，都有幾會等個市再跌多下之後滙控先至借技術反彈爬返起身，但今日見滙控啲牛證街貨多到呢…真係好受老散嘅歡迎同愛戴，暫時揀定隻滙豐牛(62790)，收回價76.18元，暫時都仲係眼看手勿動，除非下半場唔知做乜大插啦，咁就可以博大霧小注落場。
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
