昨日 10:34

輪證贏家丨你返嚟啦?!

乾咗三日嘅恒指，終於都等到今日開返條北水啦！

而噚日有揀到隻恒指熊(65398)，喺下半場開市無幾耐有見到五分鐘圖Slow STC(14.3)上返去超買位，呢個位嚟出(65398)，即使唔過夜都可以有條件做得到日內一趟Swing Trade；奈何噚日恒指喺下半場以最多接近50點嘅波幅嚟運行，再靚嘅貨但遇上唔郁嘅市，都係得物無所用。

如果隻(65398)Hold到依家嘅話，咁今朝開市嘅時候見指數向下跌98點開市，應該都滿心高興；只不過甫開市恒指玩低開高走，一度轉燈添。唯及至依家9點48分，恒指再出返盞紅燈見跌39點，報24092點，有啲戰友同我一樣都係耐性欠奉嘅，數咗格仔走人lu。

北水返嚟都睇吓啲A股嘢，皆因喺星期一(10月5日)喺老友強少嘅《CK Chan 不止是投資》度有提及過可以考慮隻南方A50(02822)嘅牛證，純綷博放完假返嚟之後A股造好而帶旺一下。依家9點57分有見隻(02822)抽緊1.3%，如果星期一有聽到而有入到嘅，咁你自己食糊啦喎。

10點後有見五分鐘圖比返啲出Swing走勢嘅條件出嚟，如常的作戰室亦都Mark住兩條線，睇吓夾唔夾得住指數運行。

坦白講指數目前仍然都係處於一個窄幅橫行嘅狀態，玩輪證嘅唔怕升亦都唔怕跌，最怕橫行；依家就係咁嘅狀態。

通常呢啲橫行嘅時間，一係有注極細注嘅貨喺度陪佢發吽逗，博忽然出方向食嗰一下；一係無貨做住嘢先；一係就再向個股方向搵食。

路過見到隻好冷門(喺輪證市場)嘅中海油田(02883)，日線圖唔差喎，今日逆市高走升半成破埋個小型「平底三角形」頂線；SLow STC(14.3)兩線亦都喺超賣位暴力觸底(今日升半成嘛)。

形態有、走勢好似有，咁都要睇吓有無產品先得嘅。So Far市場上只係得7隻海田Call，Put/牛/熊都係無嘅(明白點解話佢係冷門啦)。7隻Call全部都係價外嘅，行使價最貼嘅目8.83元，都有成16.41%價外距離，有兩隻㗎喎，咁就再比較槓桿同引伸，就會秤出(21390)呢隻係相對地條款上優勝。

要留意除咗呢隻Underlying本身係比較冷門之外，(21390)嘅到期日係今年12月頭，即係仲有大約兩個月時間啫，不過我諗你都唔會Hold好耐。

「換個股又得唔得呀?!」得! 如作戰室一樣從來都唔係只係玩牛熊，你鍾意玩乜都得，最緊要你識玩就得啦。

作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。

想睇埋美日台股、金油滙幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。