今日 10:33

輪證贏家丨假期前夕唔對路勿勉強

噚日揀咗睇返星期一喺強少嘅Youtube Channel「CK Chan 不止是投資」嘅Live度提及過嘅隻中移動(00941)，亦都執返隻中移牛(59908)出，都講到明以中移日線圖計，走勢都真係有可以再好啲，雖然Slow STC(14.3)兩線保持往超買方向走，但始終股價仍然處於「長方形」中橫行，保歷加通道口亦都未見到有拓闊嘅情況，所以呢一注偷嘅話，都係咬住個區間位嚟做，可惜位窄，最後都係和咗個手續費後，志在參與咁款。

而如果選擇繼續hold住注貨去等區間位破位嘅話，依家9點57分見日線圖低走10/20線，未到保歷加底線嘅，若然係用盡呢個區間嘅話，就要𥄫實保歷加通道嘅走勢，只要都仲keep得住呢個區間底就有條件向上抽多一下；否則落到區間底但又見保歷加底線向下嘅話，咁好倉都真係無得再留底啦。

睇返今日恒指，依家10點6分其實作戰室係未出倉，算是少有但唔罕見，因為Plan定出淡倉純往街貨方向走，但係一開市就出咗粒勁大嘅「十字星」出嚟，真心咩胃口都無晒。再到依家指數於五分鐘圖內夾住一個大約40點高嘅區間位上落，方向都未明，依家落注真係賭錢一樣，所以都係再等吓先。

嚟到依家10點18分，五分鐘圖上見指數慢慢地向上過咗10線，作戰室第一注試水溫mode決定順返大市方向走嚟先出好倉，不過都係極短睇住0線先。

如果到出文後你再睇完嘅話，指數已經再有條件撲過20線嘅，就恒指牛(60628)，收回價24028點，企低於241同242兩層重牛位，槓桿有約47.9倍，成交勁活躍亦都低街貨。

企得住五分鐘圖20線之後先至再諗借小時圖10線位啦，逐線逐圖慢慢移過去換嚟用，假期前夕，一有唔對路就閃啦。

作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。

想睇埋美日台股、金油滙幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。