今日 10:38

輪證贏家丨等收市睇何詩蓓

噚日出文時都10點半打後，向來指數最大嘅活動範圍都完咗，定住喺大約24900點附近嘅位置唔上唔落，所以唯有變陣去睇個股，於是就揀咗隻戰友呢兩三日都有睇住嘅寧王(03750)，但由於睇位時都未見到好明確嘅方向，所以目前都只係處於等緊嘅狀態，不過都執定隻寧德牛(55290)出嚟，睇吓有無得借小時圖橫行中嘅保歷加通道做趟Swing Trade。

今朝指數低開184點，一步下殺噚日嘅重貨牛247呢層(今日係第二重貨，因為噚日指數下行之後，今日嘅重貨位搬咗去243)之後，作戰室第一注唔係plan淡倉出去，反而先偷一注捉低開高走嘅好倉，放心畫住上方量度線同埋其他技術指標夾住嚟偷嘅，頭10分鐘完成偷格仔行動之後，再到依家9點53分，指數企返落去24700點呢個位，用小時圖嚟量度嘅話，向上睇50線(約24811點)，同向下望住上星期五(18日)嗰開市裂口底24606點，兩個方向都係大約100點距離，最憎。

「但係小時圖Slow STC(14.3)依家有似出觸底喎...」明白出好倉嘅原因，但都唔好忘記保歷加通道口有似拓闊，佢係可以迫到Slow STC(14.3)出超賣再超賣，更重要嘅係，指數依家個擺位係企近下方牛證街貨層(如果佢選擇向下再殺落去嘅話)。

10點後坦白講都未係好見到個方向走到出嚟，即使指數喺小時圖上有見企返上24700點/裂口頂上面，但走勢上有似細路仔放暑假，用個一個星做晒份暑期作業之後，躺平七個星期咁款；睇市嘅唔怕上唔怕落，最怕橫行。

再望吓隻寧德，依家日線圖見股價同10天線有再靠近但都未確認得到係穿定企上去，呢隻嘢再等吓添啦。

睇嚟個市都係等收工之後睇何詩蓓游女子50米自由泳決賽咁款...咁我都等埋一份lu~

作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。

想睇埋美日台股、金油滙幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Books Store上架，可免費試閱。