昨日 10:45

輪證贏家丨小時圖未見方向

噚日揀咗隻恒指牛(68077)出嚟，借返五分鐘圖嘅Slow STC(14.3)嚟做Swing Trade。以噚日Patreon喺10點半左右先至出到文，如常以10分鐘時間去睇文之後再睇返個走勢圖，剛好五分鐘圖嘅Slow STC(14.3)有見觸底上，按策略(68077)落得場。

持貨至下半場3點半到，終於見到五分鐘圖嘅Slow STC(14.3)兩線上到超買位，其數住(68077)得幾格但無奈指數真係唔願郁，策略上達標亦都唔再留戀啦；都係嗰句：贏1蚊好過輸1蚊。

今朝指數只係微跌3點開市，作戰室都Plan唔到啲乜出嚟，因為呢個點數變幅實在太細，所以選擇等開市之後，睇指數行出方向先至再追。

作戰室裏面不乏出倉動作快嘅高手，尤其是見到一兩個訊號就已經識得撲出去嘅Day Trade王，首半小時先淡後好已經自行做完買賣；遲咗入嚟嘅或者安全派(我)就等10點小時圖Update之後再睇吓咩情況。

依家10點8分，恒指嘅走勢同今朝開市後個情況大同小異，小時圖仍然有條底線接住，而五分鐘亦行出「下降通道」與「平底三角形」重疊中嘅尷尬位，作戰室暫時以出淡倉為主，不過都係以快打慢。

而喺呢度一貫用開小時圖做Trade，但暫時都真係未見小時圖有出到破位嘅情況，即使有，下方100線如果保持依家向上嘅步伐，隨時11點後就會同指數相遇，屆時又是另一個新關卡。

暫時呢個8月頭喺呢度做到嘅Trade都仲係格仔mode，未有一注正數係多於10%。今日都似悶局走，小時圖注真係未見方向捉得，索性休息一日算啦。

作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。

8月1日起一連四個星期六喺Patreon有個《短期課程》，教你最基本嘅技術分析同點樣拉線畫圖，學識自己睇走勢圖，幫自己搵支持/阻力/買入/賣出位，詳情請往Patreon搜尋「cbbcwar」。