昨日 10:24

輪證贏家丨恒指牛「築人牆」擋罰球

噚日揀咗隻恒指熊，直頭係向住要今年內新低嘅方向出發，借埋牛熊證街貨圖嚟睇，兩層過千張嘅期指街貨層亦都係目標；即係話24000點點都要穿！

及至11點18分，真係好似完成任務咁款，指數以「一點穿心法」將24000點呢個位拮穿，係呀，噚日低位係23999，之後見指數回上，淡倉亦都完成任務；可惜嘅係注淡倉喺作戰室就10點開出嘅，但如果喺呢度睇完文之後先至出嘅話，條Slow STC(14.3)未確認抽上走人先至有正數執到。

見到噚日嗰兩層千過張期指街貨嘅重貨牛，咁樣「一點穿心」隊死咗，都真係有啲感覺佢係硬穿嘅，所以噚日喺作戰室揀咗隻貼價牛出嚟，講到明係打靶都唔肉赤注。

今朝未開市之前見到個牛證街貨首五層裏面已經有四層每層儲咗有過千張期指街貨，剩返嗰一層都有900幾張期指街貨，成堆好友「築人牆」等指數開波射罰球。

搭正9點20分港股終於都起腳，開市口價終於都博得到一個着綠燈嘅裂口，有貨坐過夜嘅戰友亦都31格正數離場。
至於吉倉的都有喺今朝順U盤方向追出好倉，依家9點49分，指數再向上爬到上24600點樓上，即市出好倉嘅都有100點正數，呢一注全清還是出風箏策略，就隨得戰友們喜歡啦。

小時圖上亦見今朝指數裂口高開，一舉上破10/20線，SLow STC(14.3)兩線亦都見明顯嘅觸底上行，由上周四(6月4日)到噚日keep住於保歷加下降通道運行嘅模式終於都見突破，雖然依家唔係見到通道口拓闊，但至少都仲可以跟住Slow STC(14.3)兩線往超買方向，Swing Trade由底線到頂線啦。

恒指牛(56513)，收回價24128點，企遠啲安全啲，同現價有約510點，但唔會係依家呢個位嚟追入，因為五分鐘圖嘅Slow STC(14.3)已經上到天花板，所以比較安全嘅係等返指數喺10/20線企得住先至出動；當然亦都可以等返五分鐘圖嘅Slow STC(14.3)落到超賣位時出動，Swing Trade一趟咁做囉。

作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。

想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Boook Store上架，可免費試閱。
資訊只適用於合資格的香港投資者。本文章涉及瑞銀以外第三方機構代表之意見，其所發表的言論和觀點僅代表該第三方機構及/或其代表之個人立場，並不代表瑞銀及與瑞銀無關。資訊由瑞銀集團提供，其僅作參考，並不構成買賣建議、邀請、要約或游說。瑞銀為結構性產品的發行商，瑞銀及其成員、其聯屬公司及董事及僱員可能持有本資料所述證券之權益(作為主事人或其他）。結構性產品並無抵押品。如發行人無力償債或違約，投資者可能無法收回部份或全部應收款項。結構性產品價格可急升或急跌，投資者可能會蒙受全盤損失。過往表現並不反映將來表現。牛熊證備強制贖回機制而可能被提早終止，屆時(i)N類牛熊證投資者將不獲發任何金額；而(ii)R類牛熊證之剩餘價值可能為零。投資前應了解及自行評估有關風險，並諮詢專業顧問及查閱上市文件内有關結構性產品的全部詳情。UBS Securities Hong Kong Limited為結構性產品之流通量提供者，亦可能是唯一報價者或巿場參與者。© UBS 2026。版權所有。