9月23日 10:19

【輪證贏家】恒指熊Keep Lock10天線

噚日揀咗隻恒指熊(60547)出嚟，借返五分鐘圖見Slow STC(14.3)去返超買位時先至出動，當平時做Swing Trade方法出淡倉。

喺噚日嘅下半場大約3點見五分鐘圖Slow STC(14.3)上到超買位，(60547)符合出場件條。借返個日線圖做返耐少少嘅部署(即至少過到一晚夜嘅)，20線/「上升通道」底線/26000點係最理想嘅目標，當然人人注碼唔同，唔一定要死坐到嗰一個位嘅，中間出風箏策略嘅亦可，總之大家方向一致，就係要正數！

一陣下晝2點20分天文台就會掛8號波，由噚日開始幾乎全城為呢個風做好所有準備，今日如果要返呢個上半畫嘅你，請你路上小心；甚至係因為要港股打風不停市而需要返Office開工兼預過夜嘅證券從業員都係一樣，我絕對希望港交所會有「奇蹟」出現。

恒指今朝開市升91點，如果將隻(60547)過咗夜嘅，有無嚇一嚇先?!唔駛怕，今朝作戰室都係Plan定出淡倉嘅，去到開市後15分鐘見指數於低位出「錘頭」，再變變下比多粒燭見「破腳穿頭」，開之即追嘅呢個位已經格仔收工；同打風一樣：安全至上。

當然，你係可以選擇繼續持貨落去，咁就返番去最初所講，用日線圖去Trade嘅話，如今10線就成為(60547)嘅阻力線啦。

講定先，聽日有無市我唔知，只可以話根據現行狀況港股係打風不停市；但如果港交所額外有安排嘅話應該會講嘅。

作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。

直接去Patreon搜尋「cbbcwar」領取七日免費試用即市作戰教室

資訊只適用於合資格的香港投資者。本文章涉及瑞銀以外第三方機構代表之意見，其所發表的言論和觀點僅代表該第三方機構及/或其代表之個人立場，並不代表瑞銀及與瑞銀無關。資訊由瑞銀集團提供，其僅作參考，並不構成買賣建議、邀請、要約或游說。瑞銀為結構性產品的發行商，瑞銀及其成員、其聯屬公司及董事及僱員可能持有本資料所述證券之權益(作為主事人或其他)。結構性產品並無抵押品。如發行人無力償債或違約，投資者可能無法收回部份或全部應收款項。結構性產品價格可急升或急跌，投資者可能會蒙受全盤損失。過往表現並不反映將來表現。牛熊證備強制贖回機制而可能被提早終止，屆時(i)N類牛熊證投資者將不獲發任何金額；而(ii)R類牛熊證之剩餘價值可能為零。投資前應瞭解及自行評估有關風險，並諮詢專業顧問及查閱上市文件内有關結構性產品的全部詳情。UBS Securities Hong Kong Limited為結構性產品之流通量提供者，亦可能是唯一報價者或巿場參與者。© UBS 2025。 版權所有。