今日 13:42

【輪證下半Part】小時圖出教科書式「三飛烏鴉」

作戰室hold淡倉幾乎hold到唔得記放飯時間，而喺呢度繼續借小時圖玩，因為小時圖150線失守兼保歷加通道拓闊，所以比定恒指熊(64039)。

但與此同時，Slow STC(14.3)兩線噚日都已經落到超賣，少少擔心今日條Slow STC(14.3)未必出得到超賣再超賣，所以又比定隻恒指牛(59340)，兩手準備。

以今朝Patreon出文時間10點15分，如常用10分鐘睇文的話，則於10點25分再睇返個走勢圖，見當時五分鐘圖上指數被10線擋路後借保歷加通道向下運行。小時圖150線繼續喺頭頂，保歷加通道拓闊中而Slow STC(14.3)繼續出超賣再超賣，(64039)出動追跌。

如常的用10分鐘作為買貨時間，按期內(64039)高低位做過0.056/0.051元，平均買入價為0.0535元。

無諗到今日指數向下直殺牛證街貨，作戰室出淡倉腦輕鬆到真係唔駛用腦。截至今日上半場止，熊證向下殺咗四層街貨，好似好少呵，但夾埋有相當於3690張期指街貨。

按中午收市價23231點，低位都係23215點啫，唔爭得遠，怕且23200至23299點嗰806張期指街貨，喺下半場都隨時無埋。

換個小時圖見今日出咗教科書式嘅「三飛烏鴉」：三粒陰燭仲要一粒大過一粒，而保歷加通道口仍然保持拓闊，Slow STC(14.3)繼續指向下，如果你隻(64039)仍在手嘅話，下半場開市之後，先數下呢注有幾多格仔在手先，出風箏策略，沽半留半，保住「三飛烏鴉」帶比你呢注淡倉嘅盈利，同時留返少少博指數向下再殺牛。

但留意下方牛證已經唔係得返好多街貨，同埋有牛在手嘅應該都一早走咗；會係向下再出遠牛還是轉陣營?!唔知，亦都無乜需要知(暫時)。

Anyway，可以繼續用Swing嘅方法守住注(64039)，就係mark五分鐘圖指數用10線同保歷加底線向下Swing住落，變相五分鐘圖嘅10線係上方量度線，過線就唔守啦。

當然，你可以借到上中軸，因為博指數於保歷加下降通道而守隻(64039)，最盡都真係中軸好啦！

作者阿珊，以技術分析專心玩輪證，唔貪心，努力賺取我家肥貓罐罐。

直接去Patreon七日免費試用即市作戰教室://www.patreon.com/join/cbbcwar

資訊只適用於合資格的香港投資者。結構性產品由瑞銀發行，瑞銀證券為流通量提供者，可能是唯一報價者或巿場參與者。結構性產品價格可急升或急跌，投資者可能會蒙受全盤損失。過往表現並不反映將來表現。投資前應瞭解有關風險，並諮詢專業顧問及查閱有關上市文件。