1月13日 14:28

【輪證下半Part】手執牛熊各一學玩區間位

唔知係我年紀大還是天氣真係太冷，好少頭痛嘅我今朝開始痛到依家(係，我係無食止痛藥嘅，我係選擇由得佢嘅，因為我今朝隻手到依家都未離開過個keyboard，除咗去廁所之外)，係因為天氣太凍，凍到我個人/頭好似「拿」埋一舊咁...Anyway，開始見到陽伯熱烈地開工，可能暖一暖又會無事。

今朝打緊條稿嘅時侯，因為見到指數喺五分金鐘圖上開始出現區間上落，Swing Trade策略又點可以得一隻貨呢，所以今朝揀定一對牛熊出嚟，分別係恒指熊(66439)同恒指牛(51003)，兩隻都係貼價貨，所以高槓桿嘢都只係用於Day Trade，隨時爬格仔用。

以今朝出文時間為10點24分，如常的用10分鐘時間去睇文的話，則於10點34分再睇返個市，區間位喺今朝嘅文章出圖都畫咗，底線位大約係18700點，而10點34分呢個時間見五分鐘圖上指數已經喺18700點活過來，同時亦都見Slow STC(14.3)兩線出觸底向上，換言之玩呢一次區間位先用上嘅就係隻(51003)。

如常的用10分鐘時間作為買入時間，期內高低位做過0.044元/0.038元，平均買入價為0.041元。

持貨至11點已經見到Slow STC(14.3)兩線上返去超買位，點數計仲高過今朝畫嘅區間位頂線18800點添，變相(51003)都已經完成一趟Swing Trade，功成身退取正數就在此時。

如同平時一樣用10分鐘時間走貨嘅話，期內(51003)高低位做過0.05元/0.045元，平均走貨價為0.0475元，呢一趟hold貨唔耐都平均有6.5格或13.68%執到，多得隻牛槓桿夠高。

繼續玩區間位，Slow STC(14.3)兩線隨後向下回落，Suppose係可以做番反手動作，不過指數就無再回落返去個區間裡面，即係話指數重新生咗一個新嘅區間位出嚟，如是者順延向上移一級玩新嘅區間。

玩新區間唔係問題，只不過係將個玩法copy and paste去咗另外兩條頂底線度，但問題係新嘅區間頂至底嘅高度，足唔足以令到你夠空間去做Swing。

依家2點3分，新嘅頂線可以畫得到係大約1886X點，而底線位就等同舊嘅區間位嘅頂線，即18800點，高度比盡70點啦，比今朝畫嘅100點少咗30點。位再窄用上牛熊再換高少少槓桿放大盈利可以，甚至出動細期，10點、20點、30點咁食都真係無問題；未熟習個玩法嘅話paper Trade住先亦可。

嚟到2點7分，1886X頂線唔過向下回咗廿點左右，反手淡倉比多一樣嘢要睇嘅係堆平均線啦。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar