今日 13:28

【輪證下半Part】等有無機再出淡倉

今朝揀咗隻恒指熊(54913)出嚟，都已經盡力地喺10點之前出文，當然都係唔會夠作戰室出手嘅快啦，因為就算我出咗文，都要你睇完之後，咁先知道係出啲乜同點樣出。

以今朝Patreon出文時間為10點5分，如常用10分鐘作為睇文時間都已經係10點15分嘅事，剛好，指數喺五分鐘圖上出現咗爭三點嘅「平底」，又Slow STC(14.3)兩線出咗觸底，作戰室全員清倉或者出動風箏策略，(54913)根本無位比你落場。

無乜所謂，(54913)呢一刻出唔到唔代表一世都出唔到，作戰室當然見10線企好出返好倉反cup上去啦。而去到上半場臨完場前半個鐘，指數跌幅已經大為收窄到(@11點40報)跌112點，報21126點，唔貪心嘅食埋呢注好倉，Lunch又可以加餸。

反過來見Slow STC(14.3)依家到超買位之後，如果確認到出觸頂向下的話，咁(54913)又可以拎返出嚟玩。

下半場開市之後見五分鐘圖上嘅Slow STC(14.3)開始離開超買範圍，確認向下嘅話(54913)當然可以當Swing Trade一趟落返場啦。之不過指數之前由低位打上嚟過晒平均線之後，依家反方向向下嘅話都係重新向下逐線逐線打返落去，依家1點4分，目前指數被10/100線夾住，向下落得過10線出淡倉就按計劃咁逐線逐線向下打，一有線接就收手，當爬咗一趟格仔。

記得下半場往往比上半場悶啲同行得慢啲，點解呀...可能中環友仔未食完飯掛，你知喺中環食個Lunch，如果得一個鐘嘅話，有20分鐘嘅係等𨋢、有30分鐘嘅時間係等位，得10分鐘時間食飯之嘛...肩下粒花大嗰班，可能依家先至出去食飯都唔出奇。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar