10月10日 13:37

【輪證下半Part】恒指牛Back Test 10天線中

今朝揀咗隻恒指牛(52297)出嚟，Set好借五分鐘圖嘅10線企好而出動，因為見小時圖指數都應該會被10/20線框住，所以博嘅都係睇住小時圖20線先。

以今朝Patreon出文時間為9點59分，同以10分鐘作為睇文時間的話，則於10點9分再睇返個走勢圖，見指數有借到10線向上行，仲要係凌空咁串添，(52297)追得。

同平時一樣都係用返10分鐘作為買貨時間的話，期內(52297)高低位做過0.12元/0.099元，平均買入價為0.1095元。

我諗呢10分鐘落場時間完咗之後，你再睇返個圖都真係想講粗口，事關指數已經失守咗10線，但如果下一刻你諗住「有咩事掟走先啦都係」嘅話，喺你未開個Account出嚟佢又重新爬返上10線之上。Well，就當比少少時間指數再行下先啦，反正雖然指數呢期嘅點數都仲係好大，但見啲燭嘅燭身都唔似之前一條法棍咁拎出嚟。

唔知你係咪都係同我一樣，一邊做嘢一邊睇市(你估我真係唔駛做咩)，間中都只係望下個五分鐘圖見指數仲企住喺10線之上嘅話就繼續做嘢，隔一間又望下，隔多半個至一個鐘到，又會重新set返高少少個止蝕盤，唔覺唔覺，指數上到21500點樓上。

「同小時圖20線216XX點都仲有啲位喎」數字上係嘅，用呢個諗法去keep住注好倉係得嘅，只不過(我都差啲唔記得咗)日線圖嘅10線咪就係21510點囉，咁即係指數back test返條10天線啦喎。

日線嘅Slow STC(14.3)邊有咁快轉到反向上，咪痴線，不過午前最後一分鐘指數再創日內新高見21524點，之後仲企住喺21500點樓上收半日市，貪心啲係咪「應該架」？

Anyway，你問我，我永遠都覺得咩市況之下都應該做好自己嘅「本份」就可以，一直借住五分鐘圖10線就借五分鐘圖10線；見整條保歷加都係向上而想借到落去中軸位嘅，得，但記得記得無論咩環境都好好地借線。

明日紅日，今日出文時打出持貨嘅話要hold兩日，應該係三日先啱；三日假期你哋會留港消費定係北上尋歡？噚日睇完牙再去剪頭髮，連剪髮小姐都話佢哋啲生意靜到鬼都唔入嚟...咁倒底香港仲剩返啲咩呢？

作者阿珊，以技術分析專心玩輪證，唔貪心，努力賺取我家肥貓罐罐。