9月27日 13:28

【輪證下半Part】有無人睇21000點?!

今朝揀咗隻恒指牛(50855)出嚟，計劃等五分鐘圖10線企得返嘅話就出動。同步都揀定隻恒指熊(60347)，失10線偷格仔都有啲用嘛。

大方向仍然睇好，但指數累升咁多之下，亦都開始要膽大心細咁玩落去。今朝Patreon出文時間為10點7分，如同平時一樣用10分鐘時間去睇文嘅話，則於10點17分再睇返個走勢圖，見指數踩住五分鐘圖嘅10線，於是(50855)可以出場。

如同平時一樣，以10分鐘時間買隻(50855)的話，按期內高低位做過0.148元/0.134元，平均買入價為0.141元。

落場後預到少少麻煩，就係剛好指數向下失10線，不過擺位同之前嘅「平底」相若，啱啱出倉比多少少buffer位等睇下指數係咪要衝落山先啦。喺10點50分，指數重上10線之餘，Slow STC(14.3)亦都見重新轉勢向上。

如同噚日一樣，好倉借五分鐘圖10線出動的話，就用返呢條線做下方量度線。午前指數未失守過，期間指數一度升至20700點樓上再來年內新高兼追到上年4月中以來嘅高位；想點樣？係咪要做到單日升過千點出大奇跡日嚟賀國慶？

今日上半場指數繼續掃熊證街貨層，首八層熊證街貨全清，再向上掃上去真係得返啲骨吮，雞肋一樣。但係咁喎，如果個市係要殺貨嚟沽背後用嚟做對沖嘅貨嚟食餬嘅話，都係嗰句：比個理由嚟咩事指數依家要反方向向下跌過千點去追都唔係得好多嘅牛證先？喺上/落都要成本之下，不如索性等兩邊儲返近啲同多啲街貨之後先至開工，反正呢三日食熊食到好似流水宴咁，見到2字頭嘅恒指都唔習慣呀！

仍然有貨嘅就睇住五分鐘圖嘅10線，記得今日星期五，坐貨周weekend嘅話都唔好咁大注，Lock住10線或自己set嘅止蝕位啦！

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar