8月2日 13:41

【輪證下半Part】再來168重貨牛

今朝見住指數失守17000點之後，有似向住4月下旬嘅裂口位出發，又基於指數企咗入牛證街貨層，所以揀定隻恒指熊(65111)出嚟，只不過當時指數都落咗唔少，唯有稍等五分鐘圖遇線向下再落先偷位出動，或者用返安全策略，即係等五分鐘圖嘅Slow STC(14.3)上返超買位時，出淡倉博行Swing Trade一趟。

今日都係唔好玩嘅市，或者係不利於Day Trader，事關咁大個裂口向下打落去之後，基本上無咩事嘅話大多數都係吽住吽住咁走完場，所以今朝作戰室出動且戰且走策略，爬格仔就梗架啦，但係動作比平時加快；或者叫做唔多作留戀。

以今朝出文時間10點37分計，如常的用10分鐘時間去睇文的話，則於10點47分再睇返個市，見指數當時其實喺穿16900點之後慢動作抽緊上去，同步亦見Slow STC(14.3)兩線觸咗底，完全唔符合出淡倉條件。

直至到11點30分，Slow STC(14.3)兩線算是爬到開始接近超買位(70左右)時已經向下碌返落去。由於兩線係未確認喺超買見觸頂嘅，所以都唔符合出倉要求。

下半場開咗市半小時左右，指數重新向下再入返去16800至16899點呢個範圍，亦代表咗對重貨牛證街貨層再嚟多次威脅，作戰室魚蛋注淡倉已經喺午後見指數低於中軸時開出，如果你都想跟作戰室一齊食呢一注嘅淡倉嘅話，注碼上都留意一下。

作者阿珊，以技術分析專心玩輪證，唔貪心，努力賺取我家肥貓罐罐。