5月7日 14:01

【輪證下半Part】閂窗先

今朝指數上落過幾次之後，半場見高位18638點出上影線，由於Day Trade緣故，所以係可以慢慢見佢由一支陽燭，變成開始見到上影線，上影線愈變愈長之下，再變成「射擊之星」。好笑，當「射擊之星」出現之後，就算唔大嗌戰友都會即時放低手上所有嘅嘢，然後入隻淡倉出去；我都唔例外。「如果嗰時你老細叫緊你呢？」咁你應該同返佢講：「老細，搞咗個Shooting Star先啦！」幾次之後佢應該再回應你嘅只會係「哦」或者直接開電話login個app，唔再叫你。

出面無啦啦落雨，明明今朝都仲好好太陽，同指數一樣時升時跌咁，不過今日恒指都算易玩，「射擊之星」出現後指數向下退到18410點附近完半場。依家1點35分，下半場開市見指數同Slow STC(14.3)借緊五分鐘圖嘅Swing Trade向上回升，只係依家保歷加通道口未見拓闊，所以指數仲頂住頂線。

至於小時圖方面，指數喺上半場最後嘅一小時已經確認失10線，但依家輪到20線接力頂住指數，同時亦被上方10線夾到實一實。

出面雨愈落愈大，阿姨都係去閂窗先。(咁你話個市有幾吸引先得架)

作者阿珊，以技術分析專心玩輪證，唔貪心，努力賺取我家肥貓罐罐。

Patreon新增內容《開市前速報》，七日免費試用：https://www.patreon.com/join/cbbcwar