11月22日 13:13

【輪證下半Part】陪肥貓玩好過

今早恒指開市微升2點後，幾乎整個上半場都唔見方向，半日高低位差只有113點，日線圖上暫時陰燭，似「十字星」。對好友嚟講尚算還得神落嘅係指數於日線圖上仍然企高於10/50線之上；而對淡友而言，指數重新入返畫咗成年嘅大型「下降通道」裡面，就由得它繼續垃圾。

得113點波幅實在難以出倉，或者今日阿市都只係借下啲業績股玩小水花，但今個星期大隻業績似乎暫告一段落，要等到下個星期美團(03960)派成績表先至又有機會捉個股玩。

早兩日老細Whatsapp閒談兩句問到以為我睇好個市，的確星期一(20日)一下子再闖18000點樓上似乎都有啲希望年底造返好，不過都留底句：破得到條大型「下降通道」頂線先再算。坦白講呢條大型「下降通道」愈嚟就愈難破，再來假突破上18000點後又打回原形可以係其中一個繼續玩落去嘅方法、借返呢兩日畫出嚟嘅「上升通道」裡面再等機會出狼來了又係一種玩法。Anyway，無利益嘅嘢我相信Market係唔會做，等睇儲夠肥牛/熊先至再算。

仲有11分鐘左右下半場先至開市，八掛下個恒指波幅指數(VHSI)，日線上見VHSI行緊「楔形」，今日VHSI向下合理，波幅的確比呢兩日細咗好多。假設「楔形」繼續的話，怕且指數隨時要悶多一日半日先至到「楔形」底線，借得到呢個位再彈返上去嘅話，都要睇埋「楔形」頂線會又唔會打返佢落去。簡單嚟講，似乎VHSI講緊要有定指數再悶落去嘅心理準備。

「咁暫時傾向睇邊一邊呀？」論重貨，熊證的確吸引，不過講緊要上到18200點樓上先至可以大魚大肉；論走勢，Day Trade的話都比較著意小時圖條中軸，事關呢條線都頂咗半場，同Slow STC(14.3)兩線向下唱足半日反調。真係企得咁硬嘅話就去啦pls。

下半場返嚟見指數變動唔大，仍然都係得幾十點上上落落，怕且今日都係可以休息一日，早啲陪我家肥貓玩下先(但佢瞓到好冧)。

作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y