11月17日 14:21

【輪證下半Part】17442有啲硬

恒指再現「彈散市」，早兩日過600點升幅似乎兩日之間化為灰盡，日線圖上見噚日同前日兩粒燭不單見「穿頭破腳」，前後兩個差不多同一水平嘅裂口亦形成「孤島」；再加上今日指數開出第一口價之後，將擺位重新放喺近牛證街貨層。咁嘅情況下點會唔揀隻恒指熊(59540)應市。

以今朝出文時間見10點9分，如常的用10分鐘作為睇文時間，即於10點19分重新再睇市，勇敢嘅可以考慮直出，安全少少嘅，等一等指數喺五分鐘圖會唔會有條10/20線擋路先至再出。而當時見恒指同五分鐘圖10線愈來愈近，直出的話以10點20分至30分期間勇敢地出隻(59540)的話，期內高低位做過0.026元/0.025元，平均入場價見0.0255元。若然等10線見阻力的話，都只不過係10分鐘之後嘅事，事關10點30分見指數上到10線之後無以為繼，按10點30分至40分期間安全出(59540)嘅話，按期內高低位做過0.027元/0.025元，平均買入價都只是0.26元。換言之兩者入場位置相約，以較高者0.026元作平均買入價吧！

落場後期後指數開始偏向橫行走勢，同時亦好大膽咁Set咗以日線圖20線為目標。還好上半場見指數陰啲陰啲咁Day Low，真係唔講都唔覺，半日低位於上半場完場前10分鐘出現，見17442點，同日線圖20線(約17415點)相約，呢兩口價相差只係27點，去到呢啲位，(59540)證價半日收報0.028元，換言之呢趟恒指慢落用時間換到兩格返嚟，大注嘅唔過Lunch可以先吃，換杯熱薑蜜暖下身又得；細注或貪心鬼上身嘅，咪睇下下半場開市發生咩事先囉。

依家1點7分，下半場開市後暫時見指數都係未有太大變幅，或者今日以五分鐘圖計，有20點上落已經係「爆升」/「爆落」，比較在意嘅係由上半場最後10分鐘開始至下半場到依家都差不多開市10分鐘，指數低位都係咬住17442點，呢個「平底」會唔會平得滯呀？有試過過線但未試過落穩。過到呢條線的話，莫講話17415點見條日線圖20線，分分鐘17400點都無埋。Set好以五分鐘圖10線做量度線啦。

作者阿珊，以技術分析專心玩輪證，唔貪心，努力賺取我家肥貓罐罐。

作戰室免費試用，詳見專頁：https://bit.ly/3uixP4Y