今日 10:48
噚晚同我家老爺&老樓師兄三個人去咗一間喺我哋居住區附近開咗幾年但從未入過去嘅一間串燒店度食飯，對於我嚟講，因為間舖飲酒嘅多，而我家老爺又唔會一個人飲悶酒，所以近到離條馬路但我哋兩老從來都無入過去；老樓師兄又鍾意試新嘢，就係咁湊咗個局出嚟，唔係玩到好夜㗎咋，不過見到師兄又篤波又同隔離檯個哥哥唱K，仲約埋下次再同哥哥一齊唱咁開心，餐飯貴少少都值嘅。
睇返恒指，噚日咁跌法都真係有人歡喜有人愁。噚日再來多一次淡倉，揀咗隻恒指熊(69556)，本以為23000都會守下，但脆弱到如紙門，一篤就穿，隻淡倉去到底雖然日內都只係執到接近7%正數，主因是絕大部份嘅跌幅都係首一個鐘之內，而按Patreon出文後都已經係10點半嘅事，所以慢活嘅情況之下，隻熊變相唔係有好多格執得到。
及至今朝恒指開市價比返盞綠燈出嚟，的確係喺作戰室Plan定第一注係出好倉，睇佢技術分析出唔出到反彈樣，但等到就嚟10點有見指數撲返上23000點之後被向下壓得好急，再加埋今日牛證再儲多三層每層有過千張嘅期指街貨牛證，足料過樓下M記個Under the Castle安格斯包包，於是變陣第一注出返淡倉再追殺下面啲街貨；果然，技術分析 VS 街貨嚟計，都真係街貨贏面大少少。
10點後有見指數低位做過22807點，開返版恒指熊證load晒啲貨出嚟，再搵返22800至22899點呢個範圍嘅熊證睇，依家10點14分，收回價22800點嘅熊證仍然生存中，只不過落到2280x點幾次都仲未穿，認真無耐性嘅先收割做第一注正數無人會怪你。
再嚟到10點22分，22800點真係未穿之後指數向上抽返高，不消一分鐘指數又再反抽向上，好明顯牛熊兩邊都係度玩緊復仇者聯盟，動作慢啲都死。
以現時計，五分鐘圖保歷加頂至底線都有200零點高，但依家又抽返上中軸，先比隻恒指熊(53256)，收回價23868點，同現價有逾千點距離，槓桿有約23.5倍為全場最高，做返平時啲五分鐘圖觸頂向下Swing一趟好啦。
再出淡倉係因為唔信好倉會做得到啫。
作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。
想睇埋美日台股、金油滙幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。
