輪證贏家丨重奪50天線

噚日揀咗隻恒指熊(55589)出嚟，係諗住借小時圖捉浪頂位向下嘅；當然如果你係諗住5分鐘圖借嚟做Swing Trade一趟嘅話都係可以嘅，反正揀嗰時隻熊嘅槓桿都夠做Day Trade。後者呢個玩法喺噚日做到兩次，不過一正一負，但拉均計都有4.88%正數賺幅嘅。

依家10點12分，喺作戰室已經先好後淡兩注貨食咗，好倉注係過夜嘅，淡倉注係見今朝251上到但企唔穩而開嘅，不過大家都已經拿拿聲偷完食完之後去開工囉，半個鐘唔夠偷咗成百點，本人認為呢個「時薪」都真係高得有啲離譜。

今朝未開市之前喺作戰室的確Mark住晒啲位，指數的確係有可能再被日線同周線圖啲線頂住，所以都有喺作戰室嘅中長線班房mark住唔過線嘅話就要清咗注中線好倉；還好今朝裂口高開之後仲上到251點，反借50天線做下方量度線再守住嘅同時，風箏策略亦都出得。

即日嘅又點搞?!坦白講，呢兩日喺作戰室都係用Swing Trade嘅方法捉上落，少少辛苦但還好幅度都夠，所以要轉身快但短時間搶到一注返嚟。

嚟到依家10點30分，25100至25199點嘅熊證未死晒，而指數今日第三次再衝上25100點樓上水平，喺5分鐘圖上已經見到頂線出現啦，安全嘅當然係企得穩於25100點先至再出動啦。

恒指牛(60018)，收回價24350點，同現價有約600點距離已經係最近嗰隻啦，槓桿有約35.1倍亦都係全場最高，低街貨都重要㗎，呢個時間揀高街貨證嘅話，萬一市況逆轉出現人踩人嘅情況，就唔好問點解啦。

作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。

想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Books Store上架，可免費試閱。