今日 10:22
噚日揀咗隻恒指牛(54152)出嚟，有擔心出文後再睇完啲技術指標都上到天花板，所以建議等五分鐘圖有10/20線接住先至出動。
以噚日Patreon出文後如常用10分鐘去睇文，之後再睇返個走勢圖嘅話，見指數都向下過10線位。等到大約11點後有見指數於20線覓到支持，同步Slow STC(14.3)兩線亦於中軸水平轉返向上，所以(54152)有位出場。
持貨至下半場終於都見到指數向下穿中軸，都真係今日第一次見到，(54152)完成任務可以離場，多得今日恒指生性，呢注好倉鯨吞23格或38.02%。
久違了嘅「大陽燭」出現，不禁令人再三問多句：係咪調整完？係咪七翻身？唔駛七街瞓？技術上，日線圖的確係破晒位，同時保歷加通道亦開始轉向打橫行，有條件出返Swing Trade，Slow STC(14.3)保持往超買方向走之下，係有咁嘅條件嘅。
搭多個周線圖，見低位出咗「身懷六甲」+Slow STC(14.3)觸底上，10周線(依家見約24691點)mark做上方量度線亦唔過份。
依家9點56分，作戰室有出過淡倉但係最後都係先打和走人，再等10點後確認方向先至出注。因為喺五分鐘圖上畫到底線位有見支持之外，仲喺小時圖上見到技術分析 VS 街貨圖，的確我係有嫌Slow STC(14.3)太過高，但如果10點後小時圖150線仍然守好，疊加一條上緊嚟嘅10線給力嘅話，咁今日24400至24499點嘅過千張期指街貨熊證危險啦。
10點後有見指數向上高衝往243樓上，但依家10點4分，暫時見指數都只係高衝一下，而小時圖上見保歷加通道整條仍然向上，如果指數保持貼住頂線往上走，硬迫Slow STC(14.3)出超買再超買嘅話，為嘅應該都只係嗰層重貨熊。
既然係咁，恒指牛(55865)，收回價23616點，同現價有約540點距離，為市場上最貼價牛及最高槓桿(約39倍)之中最活躍，今日新上市所以未見有街貨。
小時圖嘅「上升通道」喺噚日一過150線之後其實已經破咗位，試吓重新再畫多條線，比一條新嘅「上升通道」出嚟睇吓。
作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。
想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Books Store上架，可免費試閱。
