今日 10:28
噚日無揀到貨出嚟，皆因期結前夕都有擔心指數會吽住走，純以街貨方向走的話，淡倉出動係較適合，只係真係無揀到貨出嚟啫；作戰室就梗係另計啦。
又嚟到期結日，即係咁又過咗一個月，噚日先同個中學同學講日子過得快，係囉，有個老友又過咗加拿大一年；然後我又老咗一歲啦...多謝你張手寫生日卡同禮物，重拾返中學嘅回憶之餘，仲要剛剛好計到咁準正日收到，你叻！
今朝指數升162點開市，不過作戰室都係選擇喺開市之後睇返指數向邊一個位走先至再決定出乜倉，唔選擇順U盤即追係因為都有見指數小時圖&日線圖頭頂都有一條擺位比較近嘅平均線喺度。不過，開市後10分鐘見指數高開低走完再向上撲返上25900點樓上，之前擔心嘅線位都過晒。
作戰室好倉都係喺9點40分左右出好倉，剛好食到一棍大陽燭，坐咗上順風車上到26000點樓上，動作快嘅咁樣一支大陽燭再搭埋輪證嘅槓桿，都已經夠完成一趟爬格仔；係呀，作戰室啲Day Trade動作快過你點支煙。
「竟然夾上唔夾落?!」有戰友提到，係囉，我本身都係咁諗，話晒下方牛證都有三層係每層過千張期指街貨架；不過順勢偷完一注好倉之後，都等緊小時圖10點後Update：會係上到保歷加頂線/50線後遇阻向下，還是推開保歷加通道口，拖住Slow STC(14.3)一齊上?!
10點後終於有答案，小時圖上見線都未掂到就已經向下，五分鐘圖開始換上用保歷加頂同10線夾住指數行，偷步淡倉嘅戰室再開埋餬可以返去工作啦。
先堜隻恒指熊(61077)，收回價26300點，同現價有約300點距離，有約54.2倍槓桿擺明Day Trade，先揀淡倉係因為依家10點12分見指數有撲上去26000點多一次，但畫住頂線唔過向下再回，順返Slow STC(14.3)向下行嘅話，先睇10線。
又如果10線有接得住，決定今日用五分鐘圖嘅保歷加頂線同10線夾住做Swing，配Slow STC(14.3)超買/賣觸頂/底上落嘅話，咁恒指牛(57544)，收回價25600點，同現價有約400點距離，槓桿有約54.2倍，同上面隻熊一樣都係有逾50倍槓桿，講多句Day Trade之餘，留意注碼。
作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。
想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Boook Store上架，可免費試閱。
