8月28日 10:52
噚日揀咗隻恒指熊(60577)，計劃指數過小時圖中軸線後出動，跟住等睇Slow STC(14.3)到超賣先，還是指數到保歷加底線先。
以噚日出文後再如常on top比多10分鐘作為睇文時間，跟手再睇返個走勢圖，指數已經向下落過20線，(60577)符合出場訊號。
去到下半場首段已經先到Slow STC(14.3)嘅%K線落到20以下，兩點打後%D線都到埋，指數兼且補返前日個上升裂口，保歷加通道底線亦都踩到，如果唔過夜嘅話，(60577)幾時食都可以。
如果用Slow STC(14.3)到返超賣/保歷加到底線而食糊計，基本上噚日下半場2點打後任何一個位食都得，平均收23.5格或41.23%；但如果守到完場前唔過夜，同樣以10分鐘作為掟貨時間的話，則可以收31格或54.39%。邊個位食同樣都係肥頸都無；而【月度報告】會以前者作記錄。
日線圖上見指數重新回落返去中軸/上升通道底線，今朝完埋個U都估到25000呢個位點都會失一失；但麻煩嘅就在於喺日線圖上中軸/上升通道底線都失守埋，的確係可以最後出條下影線抽返佢入去，但唔好忘記下方牛證24700至24799點同埋24800至24899點呢兩層牛分別都有過千張期指街貨喺度，重到呢。
至於上方熊證，即使今日有新出到收回價最貼見25300至25399點，但都同今朝開市價有300幾點距離。近牛而且牛多就更係向下斬過去啦，所以作戰室今朝都係以淡倉作為第一注，如常的用五分鐘圖+技術分析爬格仔。
仲有6分鐘先至10點，作戰室淡倉爬完之後，我都有少少喺度等個小時圖，到底Slow STC(14.3)會觸底到上，還是保歷加通道口繼續拓闊，再推佢落去呢?
恒指熊(69481)，收回價25340點，同現價有近400點距離，為市場上最貼價熊之中最高槓桿嘅一隻，有約49.9倍，未必係借小時圖個保歷加通道口拓闊，反而係睇住五分鐘圖有無再沿向下嘅保歷加通道落去，順便博埋指數向下入24800至24899點嘅重牛。
但都要提一提嘅係，如果小時圖上低位出「十字胎」嘅話，咁就暫時無得再淡下去啦。
作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。
直接去Patreon搜尋「cbbcwar」領取七日免費試用即市作戰教室
