9月30日 13:59
今朝揀咗隻恒指牛(51063)出嚟，人呢期指數升到阿媽都唔認得之下，本來連五分鐘圖啲10/20線都未踩得穩就再彈，但好歹今日都已經係第四個裂口上，由第三個打上開始已經叫做「消耗性裂口」，執雞再小心同快啲都係合情合理，所以今朝出倉條件除非平時嘅借五分鐘圖10/20線進取mode之外，都拎返五分鐘圖Slow STC(14.3)落返去超賣見觸底時先出動嘅安全mode入貨。
以今朝Patreon出文時間為9點53分，如同平時一樣用10分鐘時間去睇文的話，即於10點3分再睇返個市，當時指數已經回落到10線前出錘頭物體再向上走過，Slow STC(14.3)兩線亦於中軸水平見有似轉向，(51063)當進取mode出場。
一如以往用10分鐘時間作為買貨時間的話，期內(51063)高低位做過0.177元/0.165元，平均買入價則為0.171元。
落場後開始見到保歷加通道有橫行返嘅情況，10/20線就真係好好借實。喺10點50分時見指數向下踩住20線都真係有啲怯，還好都好快爬返上去，仲要一上連同10線一齊爬高。午前，恒指上到21300點樓上，Slow STC(14.3)兩線重新上回超買位。
如果要Keep住且戰且走嘅策略的話，中軸接指數再同Slow STC(14.3)上返超買位之後，咁就係(51063)爬格仔收割之時。當然對後市仍然有信心的話，要再坐貨過夜唔會(亦都無得)阻止嘅，但要留意明日係10.1嘅國慶假期，放完一日假返嚟之後港股係開，但A股仲要放到下個星期先開返，換言之呢個星期打後時間係無北水嘅。
依家1點19分，指數午後返嚟暫時見過高位21393點之後，有再次向下失10線。用返同一方法借到落20線都可以，不過，留意Slow STC(14.3)兩線喺1點20分打後已經離開咗超買位，唔貪心嘅話，呢啲位都可以計一計數。
一樣用返10分鐘作走貨時間的話，由1點20分起計見Slow STC(14.3)離開超買而而先收割，期內(51063)高低位做過0.204元/0.19元，平均走貨價為0.197元，第三季最後一個交易日，最後一注喺呢度出嘅，平均賺幅為26格或13.2%；牛證貴買貴賣，所以格數多百分比計出嚟係低，正常呀！但26格都唔少嘢啦！
依家1點33分指數已見重新爬番上去10線樓上，想再追嘅話就隨便，小妹要準備一陣新城電台嘅節目，所以大家國慶假期快樂啦！
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
