2月20日 13:40
今朝仲等緊指數喺小時圖上向邊一條線打過去嘅時侯，等到差啲瞓著，事關今日指數有啲似同噚日嘅走勢的確好相似，都係開市後無幾耐出現一支大棍後幾乎橫行等4點。
按今朝出文嘅時間為10點22分，如常的用10分鐘去睇文的話，則於10點32分再睇返個小時圖，當時小時圖20線擺位見16122點，而10線擺位見16203點。嗰一刻指數仍然處於10/20線之間，直至到10點45分，指數向下再落低走於20線，基本上淡倉可以比出，可惜嘅係今朝無揀到恒指熊出嚟，如果唔係今日應該可以爬到格仔喺份【月度報告】之上。
「吓？搞咁耐都只係爬下格仔咋？」係呀，睇返10點半左右時間恒指做緊16150點左右，而依家1點21分，指數做緊16075點，唔計 Lunch Time的話，指數用咗接近2個鐘先回咗75點，假設今日你用上最貼價、最高槓桿(依家見有約47倍)嘅恒指熊(69971)，度一度呢段時間的話，平均大約多咗4至5格或大約17.24%左右，的確係比之前見保歷加通道口拓闊又一直瀡咗落去無咁精彩嘅。
坦白講今日指數難搞到，莫講話用小時圖做佛系注無肉食，就連用五分鐘圖做快跑都搞唔掂，事關指數實在行得太慢，今日怕且都係時間換格仔，而如果今朝係按策略而比出咗淡倉的話，唯仍然用10/20線作為量度線，試下再比多啲時間，睇下可唔可以換到多幾格。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
