1月11日 15:11
都話「我睇到由治及興嘅好處」架啦，恒指(以中午收市計)結束七連跌，踏入2024年首次見綠燈，半日「大升」242點，中午收報16339點，而今朝揀咗隻恒指牛(62845)出嚟，諗住出動後睇下上望保歷加通道條頂線。以今朝出文時間10點13分，如常的用10分鐘作為睇文時間的話，即喺10點23分時再睇返恒指走勢圖，剛好就完成咗久違了嘅「三白武士」嘅陰陽燭形態，Slow STC(14.3)兩線喺五分鐘圖上亦都上到超買位，重點係，小時圖上見指數已經先到佢去到保歷加通道頂線。嘿，呢頭出文嗰頭到目標價，咁真係無計，硬出都唔係辦法，事關小時圖當時未見保歷加通道有拓闊，喺怕佢上到頂線稍回之下，(62845)都真係唔好衝出去住。
用返平時做Swing Trade嘅方法，五分鐘圖上見喺大約11點50分鐘左右，指數已經「回落」到去中軸水平；其實正確嚟講係整條保歷加通道向上嘅幅度大於指數回落之下，中軸上去接住咗指數，仲要守穩，同步亦見Slow STC(14.3)兩線喺中軸水平出轉勢，借呢個中軸位出隻(62845)，博指數沿保歷加上升通道而向上運行，同時借返中軸作為量度線，過線就掉走隻(62845)，因為都真心怕指數今日嘅步伐會同之前嘅情況一樣，抽高一下之後，於高位出上影線或「射擊之星」向下減速回落到4點。
Anyway，嚴守策略永遠都係出Trade嘅第一戒條，以11點50分借中軸入(62845)如常用10分鐘作為買入時間的話，期內(62845)高低位做過0.058元/0.057元，平均買入價為0.0575元。
午後見指數穩中軸後，同步保歷加通道亦見通道口拓闊，指數再上兼破埋16400樓上，依家1點26分，暫時高位見16434點，高位過後稍為回落，五分鐘圖10線雖然未到，不過Slow STC(14.3)兩線出咗觸頂，數值上目前仍然踩住喺超買範圍裡面，呢個位走隻(62845)見目前證價做緊0.068元，計一計都已經有10.5格或18.26%嘅賺幅落場，有正數當然可以袋咗先啦。
但如果你係貪心鬼嘅，試下借一借小時圖，借星期二(9日)嘅高位16414點拉條量度線出嚟，上方睇小時圖50線，唔得唔好勉強，永遠正數最緊要；要戴頭盔嘅話就將你注好倉沽半留半啦。
戰友們圍內今朝開咗個Side back係今日指數升定跌，我放低咗一碗貓糧作賭注買升，戰友就大我兩條貓條買跌；嚟到依家1點34分，怕且要將個Side back update到睇今日會唔會踩上熊證第一層啦。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試：https://www.patreon.com/join/cbbcwar
