12月8日 14:07
恒指今日似想都真心想做返場好戲，晨咁高搶到高位16464點，以1點高度補咗噚日嘅下跌裂口，期後向下回落到噚日下半場低位水平後整固咗個鐘有多(辛苦晒)，最終喺11點20分至25分開始起步跑到半日收市報16379點，升33點完半場，半日成交411億算唔算有交代？好似爭咁啲囉。但見到五分鐘圖半場收市時條保歷加通道口仍然拓闊中，比到條件Slow STC(14.3)繼續行佢嘅超買再超買，睇嚟連日線圖噚日出嘅低位「錘頭」都湊效。
以中午收市恒指擺位見，數值上指數仍算是企近於牛證街貨層(中間位為16399.5點)，同中午口收市價比只係爭19.9點，如以街貨量計，無可厚非牛證仍然比熊證多，反映大家都開始將個心放喺「尋底完成，反彈有理」之上。
睇咗一排嘅小時圖20線，午後開市返嚟指數向上再去多一下，不過嚟到差唔多1點10分，喺五分鐘圖上見出咗「射擊之星」，係呀，高位向下嘅意思，但如前文所指，上半場完結時保歷加通道喺五分鐘圖上留底咗拓闊嘅走勢，呢個拓闊似乎可以抗衡得到粒「射擊之星」。
坦白講，小時圖如果20線真係可以踩得穩，開好倉追指數上返去並唔係一件壞事，問題在於今日升幾十點唔好同人講恒指轉勢，最低限度都唔好咁快將啲MPF轉返出嚟，依家追牛有個風險就係五分鐘圖保歷加通道口要依然保持拓闊，咁Slow STC(14.3)先至可以保持出超買再超買。安全嘅當然可以等等佢稍後見唔見保歷加通道平衡返，借返Swing方法去出貨啦，大前題真係要小時圖20線守得實至好。
恒指牛(55514)，收回價16000點，同現價有約380點距離，槓桿約29.78倍，留意同一收回價嘅牛證，有啲槓桿高啲但係換股比率係20000，有啲換股比率10000都有靚仔槓桿嘅，街貨已經儲落唔少，揀嗰時望多兩眼呀，唔該。
作者阿珊，以技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
