12月4日 11:42
騰訊控股(00700)早排嘅係威係勢，哼，佢都有今日啦，個市受外圍影響今朝插二百幾點，無幾耐再跌多少少就夠數三百點；隻企鵝隨咗大裂口撻落去之外，150蚊亦一早唔見咗，人哋中國移動(00941)一早就跌定，反而隻企鵝仲有得插，騰訊Put(20829)噚日講過呢隻嘢高槓桿係因為短期，不過對於幾短炒嘅朋友嚟講，呢12倍槓桿嚟得合時，為免夜長夢多，應該走人。
個市依家咁嘅樣，其實仲處於講咗幾日嘅「直角三角形」裡面，條底線仍然係21900至21950呢個位置度，同現價(十點半計，22167點)大約爭217至267點；兼且呢個位21900至21999有609張期指，今朝早睇新聞話今晚美國有會唔知咩就業數據嘅data會公佈，唔靚仔嘅話乘機再插又何妨，咁做都只不過係將依家條14RSI由45推多少少落去40到，都唔算掂到個超賣位，未響警報又有熊仔食，真係何樂而不為。
老老實實，今日星期五，堅係唔多想坐兩日weekend，雖知道年底兼聖誕節係一個「粉飾窗櫥+普天同慶」嘅季節，失心瘋唔知做咩星期六日班財金界唔放假走嚟宣布一啲唔知乜嘢措施左右個市，就真係多得佢唔少。今日飲下我家老爺煲比我啲紅棗茶好過。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
下一篇：油股拖累 港股短期技術走勢難樂觀
上一篇：今日波幅勢擴大 考驗22000關
