昨日 10:45

輪證贏家丨恒指未見方向

噚日揀咗隻滙豐牛(56147)出嚟，講到明都只係做Day Trade，同時睇住小時圖20線，企得住嘅話先至出動，如果唔係嘅就睇返五分鐘圖，借返平時啲Slow STC(14.3)睇吓有無得做Swing Trade啦。

以噚日出文後11點小時圖Update咗之後計，股價有串過小時圖，只係喺上半場完場前守返上去，未算企穩。

中午滙控出咗份符合市場預期嘅業績，不過市場明顯唔Buy，午後返嚟見股價大陰燭向下，由142蚊直插到大約136蚊，恒指亦都被佢拖累將跌幅擴大到逾100點，再次失守23100點水平；多得收半場前有戰友提醒借滙控業績嚟出淡倉呢個策略。

的確，炒業績呢個遊戲同佢條件好同唔好都無乜關係。業績好價升同業績唔好價跌，唔難理解啦；但係業績好價格，可以解讀為趁好消息出貨/管理層對公司前景預測同市場有落差；而業績差但股價上，亦都可以被講成最壞嘅時間已經過去，最差嘅情況都已經出現晒...之類；總之，分手同一齊嘅理由有好多，但結果只得兩個。

至於第二個出食策略係用返平時嘅五分鐘圖Slow STC(14.3)做Swing Trade，揀好倉的話即係等觸底上。有嘅，就係出咗業績之後嘅下半場出現，不過，呢一注都係要負數。

今朝恒指高開後暫時呈先高後低走勢，小時圖上有見SLow STC(14.3)處於超賣位準備觸底上，再加埋23000點有似接住指數，但同時上方10/20線亦出緊力，頂住指數唔比上咁。

換個五分鐘圖出嚟嘅話，暫時作戰室先好後淡兩注偷格仔貨都已經一早偷完，因為見指數回落到中軸位六七次都穿唔到，同時開始窄幅上落，所以都係等方向中。

睇多次隻滙控，如果噚日注好倉係借五分鐘圖SLow STC(14.3)做Swing Trade而有留過夜嘅話，咁今日反而正數中；的確有少少心動想再偷多次好倉，但係你都知㗎啦，唔忿氣呢三個字隨時累死人；反正今日病病地，方向又未有，都係乖乖地等收市再等睇醫生啦。

最後，借個位幫自己賣吓廣告，反正呢個專欄寫咗11年都唔知有幾多個人見到嘅；創陞智慧策畫嘅《窩輪基礎與趣班》(aka 窩輪BB班)已經開始招生，11月9日晚就係第一堂，亦都係我人生中除咗以前喺公司教啲小朋友輪證之外嘅第一次對外「教輪」，有興趣嘅就去創陞智慧嘅FB，嗰度有個QR Code嘟完 > 報名 > 課金，就到時見啦！

作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。

想睇埋美日台股、金油滙幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。

資訊只適用於合資格的香港投資者。本文章涉及瑞銀以外第三方機構代表之意見，其所發表的言論和觀點僅代表該第三方機構及/或其代表之個人立場，並不代表瑞銀及與瑞銀無關。資訊由瑞銀集團提供，其僅作參考，並不構成買賣建議、邀請、要約或游說。瑞銀為結構性產品的發行商，瑞銀及其成員、其聯屬公司及董事及僱員可能持有本資料所述證券之權益(作為主事人或其他）。結構性產品並無抵押品。如發行人無力償債或違約，投資者可能無法收回部份或全部應收款項。結構性產品價格可急升或急跌，投資者可能會蒙受全盤損失。過往表現並不反映將來表現。牛熊證備強制贖回機制而可能被提早終止，屆時(i)N類牛熊證投資者將不獲發任何金額；而(ii)R類牛熊證之剩餘價值可能為零。投資前應瞭解及自行評估有關風險，並諮詢專業顧問及查閱上市文件内有關結構性產品的全部詳情。UBS Securities Hong Kong Limited為結構性產品之流通量提供者，亦可能是唯一報價者或巿場參與者。©UBS 2026。版權所有。