昨日 10:50

輪證贏家丨睇你頭啦！牛熊分界線！

噚日即市無揀到貨出嚟，純綷將星期一同二掟出去嘅網收返啫。作戰室就有做到即日好倉嘅，但上到257嘅時候，尤其是下半場指數吽吽地，都無再Day Trade嘢玩時，就圍爐喺度拉線畫圖，再集體決定出邊個方向嘅倉做中長線策略；一班人圍爐有商有量，總比一個人睇到嘅、諗到嘅多好多嘅。

不過最後大家都係paper trade畫住先，皆因噚日有美國議息同埋今日期結，變數都比較多，安全為上。

今朝見到隔晚美股跌過千點，都有擔心過今日港股唔多掂，不過，今朝都拎返噚日喺作戰室度出嚟嘅量度線，就係日線圖上大約259中段嘅位置出嚟，做住上方量度線先，下方用250天線嚟接住指數(噚日收市價計先啱啱過咋，熊區爬返上牛區都真係好新鮮熱辣)。

誰不知指數今早一開即撲到上日線圖頸線後，喺五分鐘圖上即見指數向下縮，縮到變成上影線再變疑似「射擊之星」嘅物體，作戰室第一注以淡倉掟出。

依家10點22分，喺五分鐘圖上見指數已經行咗個「三角形」出嚟，我都唔知係大家見到「三角形」都怕咗佢，還是係純綷被我影響到(喺GP裡面嘅戰友一定知我最憎係「三角形」)，所以大家爬完格仔之後都已經埋位工作；我都打緊稿啦~ right?!

日線圖見指數今日成燭粒都企住喺牛熊分界線之上，但形態上暫時都係出高開低走+「陀螺」物體；今日個樣似玩點數嘅多，Swing Trade都被「三角形」夾。

喺呢度我選擇休戰多一日，雖然唔同時軸圖都有出到啲訊號，但實在未係好齊，呢啲位出倉嘅話，真係同賭錢無乜分別。

作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。

8月起一連四個星期六喺Patreon有個《短期課程》，教你最基本嘅技術分析同點樣拉線畫圖，學識自己睇走勢圖，幫自己搵支持/阻力/買入/賣出位，詳情請往Patreon搜尋「cbbcwar」。