昨日 10:55

輪證贏家丨小時+日線圖兩大阻力位出現

尋日揀咗隻恒指熊(53747)，講明只係做Day Trade嘅Swing向下啫。噚日指數全日升幅係有，但都真係只限開市之後嗰半個鐘至九個字，所以之後作戰室再做Day Trade都有難度，位太窄亦都做唔得多，還好開市後嗰注好倉食得到，亦都係全日最大注，keep住唔貪心每日執少少咁做，全個月埋單就知咩料啦。

市傳港交所(00388)會延長交易時段兼Cut飯鐘，依家大家手上有個App都已經可以做交易，咁樣諗你話係咪合情合理先?!只不過圍繞住嗰市嘅又點止咁少嘢呢，我都好懷念以前兩個鐘食飯時間，可以偷偷地落中環一趟，去啲酒樓度飲個茶，偷聽吓隔離檯講嘢，收收風，然後2點埋位再炒過；呢支歌仔依家更係唱唔到啦，得一個鐘時間對班中環人嚟講真係搭𨋢落樓都無咗啦，不過老娘我到今時今日都仲有偷聽嘅「壞習慣」，哈哈。

其實作戰室以致成個Patreon成個都改緊方向，唔再專注於以前嘅炒即日，開始轉用啲過幾日甚至係一個星期嘅策略，一來依家唔似疫情時個個WFH偷到時間玩Day Trade；二來技術分析其實用係任何時軸、任何圖表都係可以嘅，所謂「授人以魚不如授人以漁」嘛，作戰室就係咁樣用。

依家10點5分，講咁耐廢話根本就係因為個市喺度玩緊燈掣，小時圖上有條頂線位約25157點，而今日見重熊區係25200至25299點，真係大膽企咁近，或者就係睇係小時圖呢條頂線，甚至係日線圖嘅100天線(截至依家10點9分止恒指高位見25253點，同100天線25257點都真係爭少少)。

恒指熊(68695)，收回價25499點，同現價有約400點距離，換股比率20000比一般嘅10000為多，但入場門檻低啲又比到一個好啲嘅槓桿(有約52.3倍)；但依家指數都仲係有似玩緊燈掣，連五分鐘圖條50線都穿唔到，怕且今日都係做Swing Trade嘅多。

畫呢啲線喺技術分析睇圖嚟講係最基本，8月起一連四個星期六喺Patreon有個《短期課程》，用四篇文嘅時間去了解一下最基本嘅技術分析，學到嘅咪你自己終身受用囉；作戰室大把戰友學完成套之後自己炒自己玩Lu~

作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。

想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Books Store上架，可免費試閱。