今日 10:45

輪證贏家丨恒指水Break完

噚日揀咗隻牛熊各一出嚟，出邊隻就要睇到出文後你睇完文再睇返個小時圖發生咩事先啦。

基於條小時圖10線都真係好耐無上破過，所以安全起見，出文後都仲見到指數擺位高於10線，所以恒指牛(69281)出動。持貨至下半場見五分鐘圖出觸頂向下嘅走勢，即日計(69281)都可以走人，呢一注平均都有五格執到㗎！

都真係好耐無見過指數出綠燈，仲要收返上23000點，的確係有少少唔習慣；而今日指數低開18點之後，喺開市初段都有見指數上行，作戰室都一度standby隻好倉，諗住向上過得到五分鐘圖嘅中軸就掟出去，無奈指數都睇嚟係搵條阻力線幫自己向下再落多一次；所以作戰室都變陣，以淡倉作為今日第一注。

喺作戰室用五分鐘圖嘅150線，再用到噚日嘅開市裂口頂，依家10點15分，已經要拎埋噚日嘅開市裂口底出嚟做下望目標，所以喺呢度...坦白講再推淡倉我都怕你睇完文之後，佢已經跌完。

但如果以小時圖嚟睇，目前保歷加通道口收窄中，Slow STC(14.3)兩線向下走的確係有繼續出Swing嘅可能。

恒指熊(67289)，收回價23100點，同現價有約380點距離，槓桿約55.7倍為全場最高。

依家10點26分，指數已經再落到226位置，淡倉呢個位先嚟出都真係小注安全，同埋可以等到五分鐘圖出少少觸底上先至「彈高熊」啦，畢竟依家呢個位都真係太低啦。

作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。

想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Book Store上架，可免費試閱。