今日 11:45

輪證贏家丨本周落注小心啲

上個星期五見指數喺開市後都係得100點上落位左右，所以做定兩手準備，揀咗隻恒指熊(66206)同恒指牛(54348)，如常的借返5分鐘圖嘅Slow STC(14,3)做Swing Trade。

好倉嗰注快嘅話喺持貨大約1小時先執平均7.5%正數；如果Miss下半場開市後無耐見5分鐘圖Slow STC(14,3)上到超買位嘅話，喺之後嘅時段都仲有位可以走到嘅。

反過來見5分鐘圖Slow STC(14,3)上到超買位而出淡倉嘅，喺下半場亦都有點幾同3點鐘呢兩個位可以出到。不過呢注淡倉出動之後，持貨至完場都未見到5分鐘圖嘅Slow STC(14,3)兩線落返去超賣位；尤其是喺3點見指數突然高衝出平頂先至去嘅淡倉注，時間上預咗過夜嘅話，咁出倉嘅時就應該準備定係小注落場。

依家9點10分，見到期貨着緊紅燈嘅，但都唔及隻騰訊(00700)着嗰盞紅燈咁閃，有見跌16.2元，日線圖上擺個位喺455蚊咁上下，還記得上個星期【本周焦點個股】揀咗隻騰訊，策略以日線圖拉出底線後有睇吓股價係低走還是高走於線，再決定出乜倉。最後係出淡倉，因為見佢低走於線，仲要即日食埋。隻嘢今個星期三放榜，10天線爬得返上去先至再諗佢啦。

見到隻騰訊咁，諗返起初初畢業出嚟做記者時，上一代嘅前輩概嘆佢哋眼中嘅股王思捷(00330)，而喺我初出茅廬時嘅股王係中移動(00941)，因為3G同iPhone面世，再到後來嘅騰訊，因為網絡極速普及同開始娛樂化，再到依家AI新世代，晶片股大熱但可惜香港就算有晶片股上市嘅，但都唔及Nvidia(NVDA)強。而Nvidia又可以坐住個王座幾耐?十年八載一定有嘅...

恒指今朝低開82點，報26310點，呢下擺位將指數推返去靠近下方牛證街貨層，會唔會向下再落?唔知，但肯定嘅係前文提過嘅恒指熊(66206)過夜嘅話，純綷將注貨完成埋Slow STC(14.3)觸頂至底呢一趟Swing Trade，咁今朝開市後見指數同Slow STC(14.3)下行，可以清埋佢。

但吉倉過夜到依家9點51分，指數於5分鐘圖上出咗「平底三角形」物體，26260水平嘅底線亦都由開市後5分鐘畫到依家就嚟10點都仲畫緊，未知指數擺喺邊個位所以都未夠出倉住。

10點後終於都見到5分鐘圖指數同10線相遇，而整條保歷加通道則向下中，開始留意住條10線，企得到上去嘅話好倉出動，借埋Slow STC(14.3)觸底上；但企唔到嘅，恒指熊(69174)，收回價26700點，槓桿有約43.1倍，Day Trade貨，雖然呢個方向走係迫Slow STC(14.3)出超賣再超賣，隨時11點打後保歷加通道口開始收窄嘅話，Swing Trade出現嘅機率增加就變成係要出好倉，但如果用街貨圖同小時圖嚟Trade嘅話，咁又唔同講法啦。

今個星期都開始多業績，星期三定四中美元首會面，Maybe觀望多過乜，小注上留意下啦。

作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。

想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Boook Store上架，可免費試閱。