4月23日 10:55

輪證贏家丨恒指熊借埋日線圖STC觸頂走

噚日揀咗隻恒指熊(56966)出嚟，按Patreon出文後再睇完文有見指數仍然低走於五分鐘圖10線，但對比作戰室出嘅淡倉都真係慢咗成個鐘有多，都預咗呢注淡倉係上半場嘅水尾。

但如果呢注淡倉Hold到過夜嚟今日嘅話，又唔同玩法啦喎，今朝指數裂口低開之後，將個開市價同牛熊證街貨併埋之後，就見指數已經向下踩住牛證第一層街貨26000至26099點，而重貨區就係第二層25900至25999點，伸長可及都覺得遠，根本就飲來張口已經可以。

作戰室淡倉出動到大約10點前，大家都執好格仔，合理，五分鐘圖低位有出「錘頭」嘛，呢啲陰陽燭形態喺作戰室講到就識背咁滯；跟住見指數受制於10線以下，再慢慢行出「長方形」，底線位大約25893點。

換小時圖上見保歷加通道口拓闊，Slow STC(14.3)兩線亦見向下，坦白講淡倉都想繼繼續落去，甚至想拉埋個日線圖出嚟Put過去。只係暫時換日線圖見依家10點34分，指數於50線位卡住，如果佢出Swing Trade嘅話，真係可以出隻Put出嚟向下望住條20天線。

只係見依家市場上嘅恒指Put，行使價由最貼價價內嘅26069點，一下子去到最貼價價外嘅25200點，7月底到期呢批嚟計嘅話，要再揀隻低引伸嘅同低街貨嘅(26022)，行使價25074點，同現價有約3.28%價外距離，對比同一收回價嘅Put佢係屬於低街貨、低引伸、高槓桿。記得呢一注如果用日線圖去做嘅話，咁反過來可以等指數確認低走50天線之後先出，睇吓食唔食得到日線圖SLow STC(14.3)觸頂向下。

最後，睇返星期二(4月21日)揀出嚟嘅日經Call(10103)，今朝有見日經撲到上高位60013點，都算是到咗之前計劃出Call嘅目標價60000點，惜指數向挫升轉跌，(10103)講到明都真係冷門貨，見日經到步後急轉向下，(10103)都唔好再攤，拿拿聲收工；如果仲守落去嘅話，咁10天線都真係要好好守住。

作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。

想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Boook Store上架，可免費試閱。